Генеральнае консульства Расійскай Федэрацыі адкрылася ў сераду ў Гродне. Яно знаходзіцца каля цэнтральнай часткі Гродна і Каложскага парку.
У цырымоніі адкрыцця ўдзельнічаў Паўнамоцны пасол Расіі ў Беларусі Барыс Грызлоў, намеснік міністра замежных спраў Ігар Назарук, іншыя расійскія і беларускія дыпламаты, а таксама кіраўніцтва горада і вобласці.
Як заявіў пасол на цырымоніі ўзняцця флага, звычайна пры адкрыцці новых дзяржустаноў доўга праводзяцца бюракратычныя фармальнасці, аднак у гэтым выпадку падрыхтоўчыя этапы былі пройдзены вельмі хутка. Паводле яго слоў, у гэтым заслуга "нашых беларускіх сяброў і адначасова сведчанне нашай агульнай зацікаўленасці ва ўмацаванні двухбаковых сувязей".
"Апошні праваўстанаўліваючы дакумент быў падпісаны 21 снежня. Як гаворыцца, можам, калі хочам!" - адзначыў пасол.
Дыпламат таксама падзякаваў беларускім уладам, у тым ліку прэзідэнту краіны Аляксандру Лукашэнку, дзеючаму кіраўніку МЗС Сяргею Алейніку і яго папярэдніку Уладзіміру Макею.
Грызлоў удакладніў, што цяпер завяршаюцца работы па тэхнічным аснашчэнні будынка. Самыя запатрабаваныя консульскія паслугі будуць аказвацца вахтавым метадам у фармаце рэгулярных выязных консульскіх прыёмаў.
Адрас Генконсульства Расіі ў Гродне – вуліца Цагляная, 2/2. Па словах Грызлова, консульскі прыём у Генконсульстве пачнецца 9 студзеня.
Новая консульская акруга ўключыць у сябе тэрыторыю Гродзенскай вобласці, якая раней адносілася да консульскай акругі генконсульства РФ у Брэсце.
Аб намеры адкрыцця Генконсульства Расіі ў Гродне паведаміў пасол Расіі ў Беларусі ў маі гэтага года. У пачатку верасня ўрад РФ ухваліў дадзеную прапанову МЗС Расіі.
У канцы лістапада кіраўнік расійскага ўрада Міхаіл Мішусцін падпісаў распараджэнне аб адкрыцці генконсульства РФ у Гродне.
Тры беларускія генконсульствы
У Расіі плануецца адкрыццё новых аддзяленняў пасольства Беларусі, заявіў намеснік міністра замежных спраў Ігар Назарук.
Паводле яго слоў, ёсць таксама прынцыповая дамоўленасць з расійскім бокам аб тым, што ў бліжэйшы час будзе адкрыта Генеральнае консульства ў Санкт-Пецярбургу.
"У далейшым у нашых планах Растоў-на-Доне і Екацярынбург", - распавёў намеснік міністра.
Пасля чаго ўдакладніў, што там ужо дзейнічаюць аддзяленні пасольства, як і ў шэрагу іншых расійскіх рэгіёнаў. Таму будзе прасцей пераўтварыць аддзяленне, надаўшы яму новы дыпламатычны статус.
"Акрамя таго ў нашых планах адкрыццё новых аддзяленняў (пасольства) у расійскіх рэгіёнах", - звярнуў увагу Назарук.
