Візіт у Беларусь дэлегацыі Еўрапарламента не адбудзецца з-за немагчымасці сустрэцца з затрыманымі апазіцыянерамі. Такое рашэнне прынята 10 лютага, паведаміў журналістам старшыня дэлегацыі Еўрапарламента па адносінах з Беларуссю Яцэк Пратасевіч.
"Не мае сэнсу сустракацца толькі з афіцыйнымі асобамі і прадстаўнікамі ўладаў", — цытуе Пратасевіча Польскае агенцтва друку (PAP). Акрамя таго, адзначыў еўрадэпутат, беларускі бок даў зразумець, што не ўсе члены дэлегацыі могуць атрымаць візы на ўезд у Беларусь.
Першапачаткова дэлегацыя Еўрапарламента планавала наведаць Беларусь да 31 студзеня, каб вывучыць умовы, у якіх улады ўтрымліваюць экс-кандыдатаў у прэзідэнты і іншых апазіцыянераў, затрыманых пасля прэзідэнцкіх выбараў 19 снежня. Еўрапарламентарыі таксама разлічвалі сустрэцца з сем`ямі і адвакатамі затрыманых, незалежнымі журналістамі, праваабаронцамі і прадстаўнікамі ўладаў.
27 студзеня Пратасевіч паведаміў, што візіт у Беларусь адкладзены на месяц "па арганізацыйных прычынах, звязаных з палітычнай абстаноўкай у краіне".
Рашэнне аб адмене паездкі было прынята сёння на сустрэчы еўрапарламентарыяў, якія планавалі ўвайсці ў склад дэлегацыі.
Антон Тарас,
БелаПАНМінск, 10 лютага 2011
