Аляксандр Лукашэнка прапанаваў Катару стварыць у Беларусі прамысловую зону "Катарскі востраў у Еўропе". Такую прапанову ён зрабіў на сустрэчы з эмірам Катара шэйхам Хамадам бен Халіфой аль-Тані, паведамляе прэс-служба прэзідэнта.
Паводле слоў Лукашэнкі, пляцоўка для стварэння прамзоны будзе выдзелена, хутчэй за ўсё, у раёне Брэста. У зоне плануецца будаўніцтва катарскіх банкаў, дзелавых і культурных цэнтраў арабскіх краін заліва, жылля і аб`ектаў сацыяльнай інфраструктуры.
Кіраўнік Беларусі паведаміў, што падчас яго візіту ў Катар абмяркоўваліся канкрэтныя ўзаемавыгадныя праекты. Паводле слоў Лукашэнкі, катарскі бок прапаноўвае стварыць у Беларусі магутны фінансавы цэнтр, яго таксама цікавіць лагістыка. "Мы гатовыя дазволіць будаўніцтва лагістычных цэнтраў каля Оршы і Брэста", — сказаў Лукашэнка.
Шэйх Хамад бен Халіфа аль-Тані выказаў зацікаўленасць у стварэнні аб`ектаў нерухомасці ў Беларусі, пачынаючы ад рэзідэнцыі самога эміра да будаўніцтва буйнога спартыўна-гасцінічнага комплексу на праспекце Пераможцаў у Мінску каля футбольнага манежа, паведамляе прэс-служба прэзідэнта.
Чыноўнікі Беларусі і Катара атрымалі ўсе неабходныя распараджэнні. "На працягу месяца кірункі супрацоўніцтва будуць сістэматызаваныя і структураваныя", — паведамляе прэс-служба. Пасля гэтага дзелавыя колы дзвюх краін сустрэнуцца спачатку ў Беларусі, затым — у Катары.
Плануецца таксама правядзенне Дзён культуры Беларусі ў Катары, а затым Дзён культуры Катара ў Беларусі.
Лукашэнка запрасіў эміра Катара наведаць Беларусь зімой.
Марына Носава,
БелаПАНМінск, 16 жніўня 2011
