У ходзе сустрэчы бакі абмеркавалі дадатную дынаміку росту тавараабароту паміж Азербайджанам і Беларуссю, наяўнасць шырокіх магчымасцей для дасягнення станоўчых вынікаў у гэтай сферы, супрацоўніцтва ў розных галінах эканомікі, у прыватнасці машынабудавання і сферы сельскай гаспадаркі, для рэалізацыі пагадненняў, падпісаных у ходзе сустрэч кіраўнікоў дзвюх дзяржаў. Акрамя таго, бакі абмеркавалі пытанні правядзення сумесных бізнес-форумаў і выставак, стварэння прамысловых паркаў, кварталаў і аграпаркаў.

Паводле слоў Мустафаева, асаблівую ролю ў пашырэнні двухбаковых адносін паміж Азербайджанам і Беларуссю адыгрываюць узаемныя візіты і сустрэчы на высокім узроўні. "Вельмі важна эфектыўна выкарыстоўваць існуючы патэнцыял для яшчэ большага пашырэння эканамічных адносін паміж Азербайджанам і Беларуссю", - адзначыў міністр.

У сваю чаргу пасол Беларусі выказаў задавальненне дынамічным развіццём эканомікі Азербайджана. "Беларусь надае вялікае значэнне супрацоўніцтву з Азербайджанам. Упэўнены, што ўзаемнае супрацоўніцтва дзвюх краін у далейшым будзе толькі пашырацца", - падкрэсліў дыпламат.

Паводле даных Дзяржаўнага мытнага камітэта (ДМК) Азербайджана, тавараабарот паміж Азербайджанам і Беларуссю ў студзені-лістападзе 2014 года склаў $88,08 млн. Пры гэтым на працягу 11 месяцаў 2014 года Азербайджан імпартаваў беларускіх тавараў на $74,46 млн, а экспартаваў у Беларусь тавараў на $13,62 млн.

6 студзеня 2014, Баку
БЕЛТА