Тэмпература на Зямлі ўпершыню ў гісторыі б’е рэкорды дзевяць месяцаў запар, аб гэтым заявіў навуковы кіраўнік Гідраметцэнтра Расіі Раман Вільфанд.
Сіноптык паведаміў, што люты на планеце стаў дзявятым рэкордна цёплым месяцам запар.
Ён падкрэсліў, што восем месяцаў тэмпература падыходзіць да мяжы Парыжскіх пагадненняў і перавышае норму на паўтара градуса.
"Пры гэтым ужо восем месяцаў, з ліпеня, глабальная тэмпература перавышае норму на 1,5 градуса. Гэта вельмі шмат", - сказаў Вільфанд агенцтву РІА Новости.
Па словах метэаролага, такое перавышэнне тэмпературы на планеце назіраецца ўпершыню.
Не ўсе адчулі
Кіраўнік Гідраметцэнтра падкрэсліў, што не варта параўноўваць надвор’е ў рэгіёне пражывання з глабальнымі зменамі.
Так, зіма ў Паўночным паўшар’і была самая цёплая за ўвесь перыяд назіранняў. Аднак, напрыклад, жыхары еўрапейскай Расіі, гэтага не адчулі, паколькі ў Маскве сярэдняя тэмпература была ніжэй за норму.
Магчымы новыя рэкорды
Раней Сусветная метэаралагічная арганізацыя ААН заявіла, што 2023 год стаў самым цёплым за ўсю гісторыю назіранняў, аднак бягучы год можа пабіць усе тэмпературныя рэкорды.
Адной з прычын рэкорднай спякоты можа стаць з’ява Эль-Ніньё, якая ўплывала на тэмпературны фон у 2023 годзе. Спецыялісты адзначаюць, што другі год пад уплывам Эль-Ніньё часта бывае цяплейшы за першы.
Парыжскае пагадненне
Парыжскае пагадненне па клімаце было прынята 12 снежня 2015 года. Яго падпісалі 175 краін, у тым ліку Расія, ЗША і Кітай. Беларусь ратыфікавала дакумент у 2016 годзе.
Мэта пагаднення – утрымаць глабальнае пацяпленне ў межах 1,5°С адносна даіндустрыяльнага ўзроўню і не дапусціць перавышэння глабальнай сярэднегадавой тэмпературы больш як на два градусы да 2 100 года.
