Міністэрства адукацыі пашырыла спісак спецыяльнасцей, на якія абітурыенты могуць паступіць без уступных экзаменаў. Змяненні ўнесены ў пастанову ведамства №44 ад 9 лютага 2023 года і апублікаваны ў аўторак на Нацыянальным прававым інтэрнэт-партале.

Адзначаецца, што ўнесеныя ў пералік 16 спецыяльнасцей з’яўляюцца найбольш запатрабаванымі эканомікай. У іх ліку:

*гістарычная адукацыя;

*руская філалогія;

*беларуская філалогія;

*геаграфія;

*бібліятэчна-інфармацыйная дзейнасць;

*землеўпарадкаванне і кадастры;

*чыгуначны шлях і пуцявая гаспадарка;

*ахова працы на вытворчасці;

*спецыяльная і інклюзіўная адукацыя;

*тэхнічная эксплуатацыя паветраных суднаў і сродкаў наземнага забеспячэння палётаў і іншыя.

Паступаць на гэтыя спецыяльнасці без здачы экзаменаў змогуць не ўсе жадаючыя, а толькі некаторыя катэгорыі абітурыентаў:

*пераможцы (дыпломы I, II, III ступені) трэцяга этапу рэспубліканскай алімпіяды па вучэбных прадметах;

*залатыя або срэбныя медалісты;

*выпускнікі каледжаў прафесійна-тэхнічнага профілю, якія маюць дыплом з адзнакай;

*мэтавікі.

Таксама на гэтыя спецыяльнасці могуць залічыць абітурыентаў па-за конкурсам, калі пасля асноўных тэрмінаў прыёму застануцца вакантныя месцы. Пры гэтым у абітурыентаў у атэстаце не павінна быць адзнак ніжэй за 6 балаў па прадметах уступных экзаменаў.

Такая опцыя будзе даступна для ўдзельнікаў заключнага этапу рэспубліканскай алімпіяды па навучальных прадметах.

Апроч таго, паступіць па такіх умовах у ВНУ без здачы экзаменаў могуць абітурыенты, якія завяршылі тэрміновую ваенную службу ў год прыёму (або за год да ўступнай кампаніі) і маюць рэкамендацыі воінскіх часцей, органаў пагранслужбы на навучанне ва ўстановах адукацыі. Такія людзі могуць быць залічаны на завочнае аддзяленне.

У 2024 годзе медалісты і выпускнікі каледжаў з дыпломам з адзнакай змогуць паступіць у рэгіянальныя ВНУ без уступных экзаменаў практычна на ўсе спецыяльнасці. Гэтае правіла не будзе распаўсюджвацца толькі на некаторыя спецыяльнасці тыпу "Ахова здароўя" і "Міжнароднае права".

Акрамя таго, без экзаменаў у 2024 годзе змогуць паступіць у ВНУ выпускнікі пяці ліцэяў – БДУ, Беларуска-Расійскага, Палескага ўніверсітэтаў, а таксама ліцэяў БНТУ і ВДУ. Каб стаць студэнтам без здачы экзаменаў, ліцэістам неабходна мець па ўсіх прадметах ацэнкі не ніжэй за 8, а па профільных – не ніжэй за 9.

Па выніках уступнай кампаніі мінулага года больш за 1,5 тыс абітурыентаў сталі студэнтамі вышэйшых навучальных устаноў без здачы экзаменаў.

Мінск, 20 лютага 2024
Sputnik