Як паведамілі ў Генеральнай пракуратуры Беларусі, праверка паказала, што дынаміка вытворчага траўматызму з цяжкімі наступствамі на дрэваапрацоўчых прадпрыемствах на працягу апошніх гадоў мае тэндэнцыю да зніжэння. Аднак яшчэ дапускаюцца такія парушэнні заканадаўства пра ахову працы, як эксплуатацыя абсталявання без ахоўных агароджаў, недастатковае забеспячэнне работнікаў сродкамі індывідуальнай абароны, невыкананне тэрмінаў правядзення інструктажу па тэхніцы бяспекі і праверак ведаў па пытаннях аховы працы.

Выяўлены таксама парушэнні супрацьпажарных норм і правіл, якія не заўсёды своечасова і ў поўным аб`ёме ліквідуюцца па прадпісаннях органаў дзяржаўнага пажарнага нагляду. Гэта з`явілася адной з прычын таго, што за дзевяць месяцаў на прадпрыемствах дрэваапрацоўкі зарэгістравана пяць пажараў, урон ад якіх склаў 115 млн. рублёў.

Падобныя парушэнні дапускаліся кіраўнікамі шэрагу правераных прадпрыемстваў і пры выкананні прадпісанняў тэрытарыяльных цэнтраў гігіены і эпідэміялогіі. Пры гэтым парушэнні санітарных норм і правіл носяць распаўсюджаны характар. Сярод іх — нездавальняючае ўтрыманне вытворчых аб`ектаў і прылеглых тэрыторый, неправядзенне лабараторных даследаванняў фактараў вытворчага асяроддзя на працоўных месцах і пашпартызацыі вентыляцыйных сістэм аб`ектаў, адсутнасць санітарна-бытавых памяшканняў, якія адпавядаюць сучасным патрабаванням.

Па выніках праверкі органамі пракуратуры Брэсцкай вобласці ўнесена 25 пастаноў, дадзена 34 рэкамендацыі і вынесена 16 прадпісанняў па ліквідацыі выяўленых парушэнняў заканадаўства аб ахове працы, аб пажарнай бяспецы і аб вытворчай санітарыі, да адміністрацыйнай адказнасці прыцягнута 22 службовыя асобы.

Вячаслаў Будкевіч, БелаПАН
Мінск, 7 снежня 2013