Беларус Максім Мірны і канадзец Дэніел Нестар (дзеляць 3-е месца ў сусветным парным рэйтынгу) выйшлі ў паўфінал буйнога тэніснага турніру ў іспанскай Барселоне з прызавым фондам 1.627.500 еўра.
У чвэрцьфінале Мірны і Нестар за адну гадзіну і 15 хвілін перамаглі Санцьяга Гансалеза (Мексіка, 35) і Крыстофера Каса (Германія, 20) — 7:5, 6:4.
Першы раўнд беларуска-канадскі тандэм, "пасеяны" пад другім нумарам, прапускаў, у другім Мірны і Нестар абыгралі Ярка Ніемінена (Фінляндыя, 118) і Робіна Хаасэ (Нідэрланды, 120) — 4:6, 6:4, 14:12 (тай-брэйк).
У паўфінале беларус і канадзец сустрэнуцца з пераможцам матчу Марцінам Маткоўскі/Марыюшам Фірстэнбергам (абодва — Польшча, дзеляць 11-е месца ў рэйтынгу) — Айзамам Курэшы (Пакістан, 14)/Жанам-Жульенам Ражэрам (Нідэрланды, 36).
Усяго за сваю прафесійную кар`еру з 1996 года Мірны 43 разы станавіўся пераможцам турніраў ATP у пары.
Аляксандр Ванковіч,
БелаПАНМінск, 27 красавіка 2012
