Аляксандр Лукашэнка: Нам трэба трымацца разам

У Мінску праходзіць пасяджэнне Савета міністраў унутраных спраў дзяржаў-удзельніц Садружнасці Незалежных Дзяржаў. На парадку дня — пытанні барацьбы са злачыннасцю, умацаванне правапарадку і арганізацыі ўзаемадзення міністэрстваў унутраных спраў дзяржаў-удзельніц СНД. Гэтыя пытанні ўдзельнікі пасяджэння абмеркавалі і з Прэзідэнтам Беларусі Аляксандрам Лукашэнкам. 

Прэзідэнт Беларусі адразу настроіў усіх не на пратакольную, а на шчырую размову, на важныя тэмы. «Я часта сустракаюся з кіраўнікамі АДКБ, СНД, сілавых ведамстваў. І ў нас заўсёды сумленная, адкрытая, прынцыповая размова. У сувязі з гэтым, рыхтуючыся да нашай сустрэчы я падумаў аб галоўным і хачу аб гэтым сказаць. Мы, мужыкі, можам адкрыта пра гэта казаць. У апошні час склалася такая сітуацыя, у тым ліку ў сувязі з правядзеннем спецыяльнай ваеннай аперацыі ва Украіне, што многія і кіраўнікі, (і што граху ўтойваць, і сілавікі, чаго быць катэгарычна не павінна), пачалі нейкую выгаду для сябе ў гэтым шукаць, — адзначыў ён. — Ведаеце, мужыкі, зыходзячы са свайго досведу, скажу, што жыццё такое бурнае цяпер і вельмі зменлівае. Многія шукаюць для сябе выгаду, у тым ліку адыходзячы ад агульнага нашага, створанага ў савецкія часы трэнду развіцця». Кіраўнік дзяржавы заўважыў, што часткова гэта звязана з тым, што краіны, асцерагаючыся санкцыйнага ціску, аддаляюцца ад Расіі і шукаюць больш выгадныя для сябе шляхі. «Не рабіце гэтага. Яшчэ раз падкрэсліваю, жыццё вельмі бурнае, зменлівае. І хто ведае, што будзе заўтра з намі, з нашымі дзяржавамі, ці не давядзецца звярнуцца да той жа Расіі па дапамогу. А апошнія падзеі гавораць аб тым, што нікому мы не патрэбныя — ні Расія, ні мы з вамі. Нам трэба трымацца разам», — падкрэсліў ён. Па словах беларускага лідара, палітычны курс Захаду можа актыўна мяняцца.

«Вось быццам бы выбудавана палітыка Злучаных Штатаў Амерыкі ў свеце за апошнія чатыры гады пры цяперашнім прэзідэнце. Вызначана: гэтыя — сябры, гэтыя — ворагі, гэты сукін сын, але наш, гэты — чужы. Улада памяняецца — будзе як у Афганістане, сапраўды будзе, гэта не першы раз. Ім для таго, каб уладу памяняць, трэба абавязкова якую-небудзь вайнушку развязаць. Не дай бог, яны выкарыстаюць канфліктную сітуацыю на Блізкім Усходзе для развязвання новай сусветнай вайны. Яны і на гэта гатовы пайсці. Я, крый божа, не агітую вас супраць ЗША ці нейкіх вашых традыцыйных саюзнікаў. Вы з усімі павінны сябраваць і выбудоўваць адносіны з тымі, хто гэтага жадае. Але не губляйце тое, што мы стварылі за апошнія гады. Гэта шмат у чым залежыць ад нас, сілавікоў. Шмат у чым залежыць. Я пра гэта падумаў, ідучы на гэту сустрэчу», — падзяліўся сваімі думкамі Аляксандр Лукашэнка.

«Наша раўнапраўнае партнёрства, падмацаванае добрай дагаворнай базай, праверанае часам, сфарміравана на прынцыпах адкрытасці, даверу і ўзаемадапамогі», — заўважыў Прэзідэнт. Ён падкрэсліў, што ніхто з міністраў не скажа, што, напрыклад, міністр унутраных спраў Расіі на кагосьці цісне. Наадварот — усе міністры дапамагаюць адзін аднаму і аказваюць максімальную падтрымку, наколькі гэта магчыма.

«Гэта кажа на карысць нашага супрацоўніцтва. За гады сумеснай працы мы не раз пераконваліся: толькі разам можна максімальна эфектыўна супрацьстаяць глабальным, трансгранічным, а таксама ўнутраным пагрозам. Таму што побач — сябры і паплечнікі, якія заўсёды падставяць плячо, — сказаў Аляксандр Лукашэнка.- З боку Беларусі вы атрымаеце толькі гэта. Мы заўсёды будзем, наколькі гэта магчыма і немагчыма, падтрымліваць і супрацоўнічаць з усімі вамі». Прэзідэнт заўважыў, што памылкова думаць аб тым, што невялікая дзяржава не можа быць карыснай іншай дзяржаве. Калі ёсць жаданне — нават невялікія дзяржавы могуць падставіць плячо і сур’ёзна дапамагчы партнёрам розных праблемных сітуацыях. 

«Міністэрствы ўнутраных спраў краін СНД — гэта, па сутнасці, шчыт для добрапрыстойных грамадзян і меч для злачыннага свету. Але толькі, калі мы будзем разам. Зыходзячы з гэтага, Беларусь заўсёды выступала і выступае паслядоўным прыхільнікам інтэграцыі ў рамках Садружнасці Незалежных Дзяржаў, у дадзеным выпадку — далейшай інтэграцыі праваахоўных органаў», — сказаў Прэзідэнт. Аляксандр Лукашэнка заўважыў, што задачы перад Міністэрствамі ўнутраных спраў стаяць сур’ёзныя. І акрэсліў асноўныя з іх.

«Мы цудоўна бачым, як сёння нашы краіны спрабуюць пасварыць і раскалоць знутры. Мы знаходзімся пад прэсам незаконных, абсалютна незаконных аднабаковых эканамічных санкцый. Супраць нашых народаў вядзецца перманентная гібрыдная вайна», — заўважыў кіраўнік дзяржавы. 

Як заўважыў беларускі лідар, у кожнай краіне можа скласціся сітуацыя, якую без адзінства з саюзнікам не вырашыць. «І калі мы сёння гэта не зразумеем, з намі разбяруцца паасобку. Але калі абрынецца Расія, мы ў гэтую варонку ўсё пацягнемся», — падкрэсліў ён. 

Аляксандр Лукашэнка падкрэсліў, што за апошнія некалькі гадоў «каляровым рэвалюцыям» падвяргаліся ўсе краіны СНД. Хоць, паводле яго слоў, у Беларусі ў 2020 годзе была не «каляровая рэвалюцыя», а адкрыты мяцеж.

«Каляровая рэвалюцыя» — больш спакойная, працяглая па часе — яна ніяк не магла прайсці ў Беларусі, таму абралі шлях мецяжу, наскокам узяць уладу тут, як фашысты ў 1941«, — растлумачыў ён. Падобныя сцэнарыі, няхай і ў больш мяккім варыянце, ужо разгортваліся ў Арменіі, Кыргызстане, Казахстане, Узбекістане. І, як звярнуў увагу беларускі лідар, «хворыя месцы» ў гэтых краінах у спакоі не пакінуць і ўвесь час будуць на іх іграць. «У 2020 годзе такую „каляровую рэвалюцыю“ спрабавалі пракруціць і ў Беларусі. Разлічвалі на бліцкрыг. Дзейнічалі па вядомых метадычках. Мы тады не дапусцілі развалу краіны і пачатку грамадзянскай вайны і зрабілі шэраг радыкальных крокаў па змене сітуацыі ў Беларусі», — нагадаў кіраўнік дзяржавы. 

Як заўважыў Аляксандр Лукашэнка, зараз на прасторы СНД, у сувязі з дзейнасцю Захаду і перш за ўсё ЗША ва Украіне, гэта праблема квітнее. Таму барацьбу з тэрарызмам ён назваў найважнейшай задачай. «Я заўсёды свайму міністру кажу: без міліцыі мы нічога не зробім. Ні КДБ, ні Міністэрства абароны, ні вертыкаль улады, якая ў нас жорсткая, — ніхто нічога не зробіць без міліцыі. Міліцыя ведае ўсё. Робіць яна — не робіць, гаворыць пра гэта — не гаворыць, але міліцыянеры ведаюць усё. Яны ўсюды — ад участковага да міністра ўнутраных спраў. Таму ад вас у любой краіне залежыць усё. А галоўнае — гэта атрымаць папераджальную інфармацыю. Калі яна ад вас паступае — значыць, мы пачынаем дзейнічаць». 

Беларускі лідар звярнуў увагу, што сёння міжнародны тэрарызм выкарыстоўвае найноўшыя тэхналогіі і медыярэсурсы для прапаганды сваёй дзейнасці. Таму, па яго словах, эфектыўная барацьба з гэтым злом патрабуе комплекснага падыходу, які ўключае палітычныя, сацыяльныя і эканамічныя меры, развіццё міжнароднага супрацоўніцтва і абмен інфармацыяй. «Толькі разам можна супрацьстаяць гэтаму», — канстатаваў ён. 

Аляксандр Лукашэнка заўважыў, што зараз гэта агульная праблема для краін СНД. Але факты сведчаць аб тым, што сітуацыю паступова ўдаецца пераламаць. «Пасля пачатку правядзення СВА намі зафіксавана актывізацыя дзейнасці махляроў, у тым ліку і кол-цэнтраў, якія дзейнічаюць на тэрыторыі Украіны. Узрасла колькасць спроб дэстабілізацыі работы дзяржорганаў шляхам загадзя лжывых паведамленняў аб мініраванні важнейшых дзяржаўных аб’ектаў. А таксама махлярствы ў адносінах да звычайных грамадзян. На тэрыторыі вашых краін таксама ёсць такая праблема, таму досвед барацьбы з падобным злом будзе цікавы ўсім», — падсумаваў ён.

Асаблівая ўвага на сёлетнім пасяджэнні будзе ўдзелена святкаванню 80-годдзя Перамогі ў Вялікай Айчыннай вайне. «Дзень Перамогі — самая памятная і ўрачыстая дата ў нашай агульнай гісторыі. Яна сімвалізуе адзінства і мужнасць савецкіх народаў перад тварам фашызму — найстрашнейшай пагрозы ўсяму чалавецтву. Тут у нас разыходжанняў няма. Усе народы Савецкага Саюза ваявалі і тысячамі гінулі на франтах. Больш за тое, народы Цэнтральнай Азіі прытулілі мільёны жыхароў тых тэрыторый, якія былі акупаваны ў першыя гады вайны», — заўважыў Прэзідэнт. Ён выказаў упэўненасць, што Заява Савета міністраў унутраных спраў, якая будзе прынята па выніках форуму, стане не толькі данінай памяці дзясяткам мільёнаў вайскоўцаў і мірных савецкіх грамадзян, якія загінулі дзеля таго, каб мы сёння жылі. Гэта будзе зварот да наступных пакаленняў з заклікам свята берагчы гістарычную памяць і праўду пра найстрашнейшую вайну. «І ніколі не забывацца, што мы — нашчадкі Пераможцаў. І гэта вялікі наш здабытак», — сказаў беларускі лідар. 

Разам з тым Аляксандр Лукашэнка, звярнуў увагу, што не трэба забывацца і аб злабадзённых пытаннях, і не зацыклівацца толькі на захаванні памяці аб вайне. «Давайце будзем сур’ёзна дзейнічаць па асноўных напрамках міністэрстваў унутраных спраў. Яны выразна выкрышталізаваны жыццём, яны дакладна вызначаны. І вось там трэба прымаць рашэнні. Калі мы прынялі рашэнне — давайце ў гэтым кірунку будзем дзейнічаць усё разам. Не дай бог, каб у нашых краінах, незалежных дзяржавах адбылося нешта, калі трэба будзе звяртацца да поўнамаштабнага дзеяння сілавых структур. Але мы ад гэтага не застрахаваны. Будзем разам — і ніякія „каляровыя рэвалюцыі“ і іншыя мецяжы нам не страшныя», — сказаў ён. 

Аляксандр Лукашэнка падзякаваў міністрам за гатоўнасць да супрацоўніцтва, за імкненне і надалей актывізаваць сумесныя намаганні для забеспячэння бяспекі і аховы правапарадку. «Вы павінны ведаць: мы заўсёды гатовы прыйсці да вас на дапамогу, гатовы дзейнічаць адэкватна. Толькі давайце па дробязях сварыцца не будзем. Гэта заўсёды накладвае ненармальны адбітак на нашу працу. — падкрэсліў ён. — Наша пазіцыя — мы толькі за тое, каб мы былі разам. Мы хочам быць разам з вамі. У адваротным выпадку, нас паасобку парвуць, падзеляць і моцныя свету гэтага, вы ведаеце хто гэта, возьмуць нас цёпленькімі, не прыклаўшы на гэта ніякіх намаганняў. Таму давайце будзем разам». 

Ад імя ўсіх членаў Савета міністр унутраных спраў Азербайджана Вілаят Эйвазаў падзякаваў Аляксандру Лукашэнку за цёплы прыём. «Нашы краіны звязаныя цеснай сувяззю сяброўства. Узаемадзеянне паміж органамі ўнутраных спраў нашых краін знаходзіцца на высокім узроўні. Ёсць прававая аснова, паспяхова адшукваем злачынцаў, абменьваемся вопытам», — адзначыў ён. 

Размаўляючы з журналістамі, міністр унутраных спраў Расіі Уладзімір Калакольцаў заўважыў, што пытанні, якія абмяркоўвае Савет міністраў унутраных спраў СНД — не новыя, але важныя.

«Кожны раз мы карыстаемся гэтай пляцоўкай, каб зверыць гадзіннікі і яшчэ раз закрануць самыя вострыя пытанні. Напрыклад, барацьбу з кіберзлачыннасцю, узаемадзеянне ў пытаннях вышуку злачынцаў, якія схаваліся. А ў нас ёсць станоўчыя вынікі ўзаемадзеяння. За паўгода міністэрствы ўнутраных спраў краін СНД сумесна адшукалі 213 грамадзян, якія знаходзяцца ў вышуку, з іх 130 — гэта тыя, каго шукала Расійская Федэрацыя. Шмат гэта ці мала, сказаць цяжка. Бо за кожным такім злачынцам стаяць лёсы кагосьці, чые правы парушаны. Ёсць станоўчыя пытанні. Ёсць пытанні, якія маюць патрэбу ў далейшай дапрацоўцы. Ва ўмовах сённяшняй рэканструкцыі светаўладкавання запатрабаванасць міжнародных пляцовак узрастае. Такая пляцоўка, як Савет міністраў унутраных спраў краін СНД, яшчэ раз паказвае наша эфектыўнае ўзаемадзеянне. Мы маем паступальнае развіццё ў бок канкрэтнага выніку. А канкрэтны вынік — гэта вынікі праваахоўнай працы ўсіх нашых калег на прасторах Садружнасці на карысць грамадзян нашых краін», — адзначыў ён.

Уладзімір Калакольцаў падкрэсліў, што Міністэрствы ўнутраных справы займаюць важнае месца ў дзяржаўным уладкаванні нашых краін: «Ад намаганняў і эфектыўнасці работы нашых ведамстваў залежыць дабрабыт людзей, іх адчуванне бяспекі. І па выніках нашай работы людзі даюць адзнаку дзейнасці ўсёй улады ў нашых дзяржавах. Таму мы стараемся выконваць задачы, якія ставіць перад намі народ, і даручэнні нашых кіраўнікоў. Мы запэўнілі Аляксандра Рыгоравіча, што пастараемся зрабіць усё магчымае, каб усе ўстаноўкі і даручэнні выконваліся дакладна ў тэрмін з высокім узроўнем рэзультатыўнасці. І запэўнілі, што мы будзем дасягаць гэтага разам».

Міністр унутраных спраў Беларусі Іван Кубракоў адзначыў, што галоўная задача органаў унутраных спраў — працаваць так, каб кожны чалавек адчуваў сябе ў бяспецы. «І мы робім усё для таго, каб і ў нашай краіне, і ў краінах СНД людзі адчувалі сябе спакойна. Праблема ўсюды аднолькавая — гэта злачыннасць, а, як вядома, злачыннасць не мае межаў. Мы з нашымі калегамі выпрацоўваем актуальныя рашэнні», — сказаў ён. Па словах міністра, ідзе актыўны абмен досведам паміж праваахоўнікамі краін СНД. Напрыклад, краінам СНД цікавы досвед, які Беларусь набыла ў 2020 годзе. «Усе бачылі, якая была сітуацыя, які аказваўся ціск на супрацоўнікаў органаў унутраных спраў і іх сем’і. І мы дзелімся гэтым досведам. Наш досвед даволі цікавы, таму што тады мы выдужалі, не далі разграміць нашу краіну. Усе зацікаўлены, каб у краінах быў мір і парадак, таму ўсе калегі наш досвед пераймаюць», — адзначыў Іван Кубракоў. Ён падкрэсліў, што некаторыя яго калегі, якія першы раз прыехалі ў Беларусь, здзіўлены парадкам і бяспекай на вуліцах. «Яны асабіста пераканаліся, што людзі ў Беларусі адчуваюць сябе ў бяспецы. Для нас гэта самая галоўная ацэнка. Прэзідэнт сёння паставіў задачу міністэрствам унутраных спраў трымацца разам. Калі МУС працуе разам, адзіным кулаком, тады парадак будзе панаваць ва ўсіх краінах і нашыя людзі ў любой краіне СНД будуць пачувацца ў бяспецы. І мы гэтую задачу выканаем», — падсумаваў міністр.