Увазныя пошліны ЕАЭС: РФ і Казахстан саступілі мільёны долараў на карысць РБ

Для Расіі і Казахстана былі зніжаны нарматывы размеркавання сум увазных мытных пошлін, для Беларусі яны павялічыліся.

Бюджэт Беларусі атрымае мінімум 20 мільёнаў за кошт змяненняў у дагаворы Еўразійскага эканамічнага саюза (ЕАЭС) пра ўвазныя пошліны. Сваю долю беларускім партнёрам саступілі Расія і Казахстан.

Савет Федэрацыі РФ 25 сакавіка ратыфікаваў пратакол пра папраўкі ў дагавор аб ЕАЭС ад 2014 года ў частцы замацавання новых нарматываў размеркавання сум увазных мытных пошлін паміж бюджэтамі дзяржаў-членаў аб'яднання. Дакумент быў падпісаны яшчэ ў кастрычніку 2019 года ў Ерэване кіраўнікамі краін-удзельніц Саюза, рашэнне ўступіла ў сілу з 1 студзеня 2020 года.

Паводле новых зменаў, для Беларусі нарматыў павялічаны на 0,3% - з 4,56% да 4,86%, для Расіі, наадварот, паменшаны на 0,2% - з 85,265% да 85,065%. Для Казахстана - паніжаны з 7,055% да 6,955%, для Арменіі і Кыргызстана нарматывы захаваны без змяненняў - 1,22% і 1,9%, адпаведна.

У ходзе пасяджэння Савфеда сенатар Уладзімір Джабараў адзначыў, што рэалізацыя пратаколу паменшыць паступлення ад імпартных пошлін у расійскі бюджэт на амаль 20 мільёнаў долараў.

Пры гэтым дадатковыя паступлення пойдуць у даход Мінска.

"Мы ў дадзеным выпадку некалькі саступаем нашы даходы ў Беларусь, гэта яшчэ адно пацверджанне партнёрскага характару нашых адносін", - падкрэсліў кіраўнік міжнароднага камітэта Савфеда Канстанцін Касачоў.

"На працягу некалькіх гадоў Мінск вёў перамовы ў рамках ЕАЭС менавіта па пераразмеркаванні гэтых пошлін на карысць Беларусі - гэта будзе каля 20 мільёнаў долараў, паводле заявы Джабарава. З аднаго боку, гэта нязначныя грошы ў рамках ацэнкі міждзяржаўных гандлёвых адносін. Аднак яны дэманструюць сам характар гатоўнасці краін ЕАЭС ісці на дамоўленасці з улікам цікавасці ўсіх удзельнікаў Саюза. І тым самым даюць зачын на фарміраванне больш цесных эканамічных адносін, у першую чаргу - дзелавога даверу адзін да аднаго", - лічыць эканаміст Аляксей Аўдонін.

Па словах Аўдоніна, цяпер для краін ЕАЭС важна забяспечыць абарону ўнутранага рынку. І пераразмеркаванне такіх пошлін азначае, што вялікая ўвага будзе надавацца працы мытных органаў Рэспублікі Беларусь па таварах, якія будуць рухацца на тэрыторыю дзяржаў Саюза.

"Цяпер ва ўмовах каронавіруса і чаканага эканамічнага спаду важна, у першую чаргу, забяспечыць узаемнае разуменне, давер, захаванне раней дасягнутых дамоўленасцяў і, безумоўна, абарона ўнутранага рынку. Менавіта ўнутраны рынак краін ЕАЭС будзе цяпер з'яўляцца ключавым драйверам для Беларусі, Арменіі, Расійскай Федэрацыі, Казахстана ў перыяд чаканага эканамічнага спаду", - дадаў Аўдоніна.

Расійскі сенатар Аляксей Кандрацьеў таксама запэўніў, што цяпер ідзе велізарная праца па гарманізацыі мытных кодэксаў, мытнага заканадаўства ў рамках адзінай мытнай камісіі.

ЕАЭС - міжнароднае інтэграцыйнае эканамічнае аб'яднанне, створанае на базе Мытнага саюза і Адзінай эканамічнай прасторы, функцыянуе Саюз з 1 студзеня 2015 года. Зараз членамі ЕАЭС з'яўляюцца Арменія, Беларусь, Казахстан, Кыргызстан і Расія. Галоўнае прызначэнне саюза - стварэнне ўмоў для свабоды па прасоўванні перамяшчэння тавараў, паслуг, капіталу і працоўнай сілы на тэрыторыі вышэйназваных дзяржаў.

Мінск, 27 сакавіка 2020
Sputnik, Марыя Навуменка