Аб гэтым 13 верасня паведаміў намеснік міністра фінансаў Юрый Селіверстаў на пасяджэнні Пастаяннай камісіі Палаты прадстаўнікоў па эканамічнай палітыцы.

З улікам прапаноў Міністэрства па падатках і зборах прапануецца спаганяць ПДВ з абаротаў па рэалізацыі электронных паслуг, якія аказваюць міжнародныя кампаніі, што знаходзяцца за межамі краіны. Да гэтых паслуг належаць пастаўка і абнаўленне праграмнага забеспячэння, доступ да баз даных, доступ да фільмаў, музыкі і г.д. Такі парадак ужо дзейнічае ў Еўрапейскім саюзе з 2015 года, у Расіі ён будзе прымяняцца з 2017-га.

"Мы прапануем увесці яго ў Беларусі з 2018 года, але ў Падатковым кодэксе гэта абгаварыць ужо сёння, каб усе ведалі правілы гульні і працавалі па іх", - адзначыў Юрый Селіверстаў.

Паводле інфармацыі намесніка старшыні Пастаяннай камісіі па эканамічнай палітыцы Уладзіслава Шчэпава, у 2017 годзе глабальных змяненняў у падатковай палітыцы не плануецца.

Індэксацыя падатковых ставак для прадпрымальнікаў будзе на ўзроўні інфляцыі. Стаўку падатку на зямлю плануецца адвязаць ад валюты. Стаўкі акцызаў могуць пераглядацца з улікам эфектыўнасці вытворчасці і знешнеэканамічнай кан`юнктуры. Пры гэтым на пасяджэнні камісіі адзначана, што росту рознічных цэн на бензін у наступным годзе не плануецца.

13 верасня 2016, Мінск
БЕЛТА