Скардзіна адстралялася "па нулях" на абодвух агнявых рубяжах, але ў хуткасці на трасе яна саступіла тройцы прызёраў. Беларуска фінішавала 8-й, адстаўшы ад пераможцы на 44,2 секунды. Крыўко таксама не дапусціла ніводнага промаху, але па хуткасці на дыстанцыі была крыху павольнейшай, чым Скардзіна. Яна заняла 11-е месца з адставаннем 59,2 секунды.

Перамагла францужанка Мары Дарэн-Абер, якая пераадолела трасу за 20 хвілін 9,7 секунды (0+0). Другой была фінка Кайса Мякярайнен (0+1; 11,4), трэцяй — чэшка Габрыэла Каукалава (0+0; 19,9).

Беларуска Дар`я Юркевіч, якая заваявала бронзу ў індывідуальнай гонцы на 15 км у спрынце, стала толькі 59-й (0+2; +2.35,9).

Надзея Пісарава, якая вярнулася ў Кубак свету, паказала 50-ты вынік (0+2; +2.18,6).

Горшай з беларусак стала Анастасія Кінунен, якая дапусціла 7 промахаў (3+4; +4.32,4) і паказала 101-шы вынік са 103 удзельніц.

4 снежня 60 лепшых біятланістак па выніках спрынту возьмуць удзел у гонцы пераследу.

Аляксандр Ванковіч, БелаПАН

Мінск, 3 снежня 2016