З новага навучальнага года школам будзе дадзена магчымасць уводзіць дадатковыя гадзіны на працоўнае навучанне для вучняў 10—11-х класаў з мэтай прафесійнай падрыхтоўкі па шэрагу прафесій. 

Паводле яго слоў, працоўнае навучанне ў школе — "гэта выдатны падрыхтоўчы этап да жыцця і карысць яго відавочная".

На ўроках працы ў вучняў фарміруецца вопыт агульнапрацоўнай, гаспадарча-бытавой дзейнасці, што, несумненна, спрыяе іх сацыялізацыі і падрыхтоўцы да выканання сацыяльных роляў гаспадароў дома, адзначыў чыноўнік. Акрамя таго, школам дадзена магчымасць праводзіць факультатыўныя заняткі па працоўным навучанні, арганізаваць грамадска карысную працу з навучэнцамі.

"Што тычыцца пытання працоўнага навучання старшакласнікаў, то і сёння ў 10—11-х класах можа выкладацца прафесійная падрыхтоўка рабочых і служачых, мэтай якой з`яўляецца даць магчымасць навучэнцам атрымаць першасныя навыкі па пэўнай прафесіі, мець магчымасць пераканацца ў правільнасці свайго прафесійнага выбару, а ўстановам прафесійна-тэхнічнай адукацыі — атрымаць падрыхтаваных абітурыентаў", — сказаў міністр.

Ён растлумачыў, што ў старэйшых класах упор у працоўным навучанні будзе ў першую чаргу на дапрафесійную і прафесійную падрыхтоўку будучых выпускнікоў. Асабліва гэта будзе тычыцца тых, хто будзе ісці ў агульнаадукацыйныя класы без павышанага ўзроўню вывучэння тых ці іншых прадметаў.

"Выпускнікі змогуць выбраць асваенне якой-небудзь прафесіі, спецыяльнасці, па якой змогуць пайсці працаваць, альбо працягнуць навучанне ў сістэме прафтэхадукацыі або сярэдняй спецыяльнай пасля 11-га класа. Цяпер такі нарматыўны дакумент намі адпрацаваны, гэта пастанова ўрада, якая праходзіць узгадненне з усімі зацікаўленымі міністэрствамі", — паведаміў Карпенка.

У краіне, адзначыў ён, такая форма ёсць, крыху больш за 7 тыс. навучэнцаў займаюцца па такім кірунку, але спатрэбілася стварэнне адзінага нарматыўнага падыходу для таго, каб аднолькава прымяніць гэтую норму на ўсёй тэрыторыі Беларусі.

Ірына Турчына, БелаПАН
Мінск, 21 сакавіка 2018