Абсалютным лідарам у спаборніцтве прызнана першакурсніца факультэта геаграфіі і геаінфарматыкі (ФГіГ) БДУ Юлія Мацель.

Другое і трэцяе месцы таксама заваявалі студэнты ФГіГ; трэцякурсніца Ульяна Рондак і першакурснік Мікіта Віхараў. На чацвёртым месцы размясціўся трэцякурснік Санкт-Пецярбургскага дзяржаўнага ўніверсітэта (СПбДУ) Данііл Акулаў. Пятым па колькасці балаў стаў першакурснік Брэсцкага дзяржаўнага ўніверсітэта імя А.С.Пушкіна Ягор Цыбульскі. Узнагароду за шостае месца атрымала магістрантка СПБДУ Аліса Кочатава. Сёмае і восьмае месцы занялі студэнты ФГіГ БДУ: трэцякурсніца Ірына Крывёнак і чацвёртакурсніца Станіслава Драбянок адпаведна. Дзявятай стала першакурсніца СПбГУ Дар’я Ігнаценка. Закрыў дзясятку лепшых удзельнікаў магістрант ФГіГ БДУ Раман Пульвас.

Удзельнікам трэба было прайсці два туры алімпіяды. Кожны этап уключаў тэст з 50 пытанняў па фізічнай геаграфіі, геаэкалогіі, землязнаўстве, метэаралогіі, эканамічнай, сацыяльнай, палітычнай, рэкрэацыйнай геаграфіі свету і інш.

Усяго за званне галоўнага знаўцы змагаліся больш за 180 студэнтаў і магістрантаў з 17 ВНУ Беларусі, Расіі, Казахстана і Узбекістана. Сярод іх БДУ, Гомельскі дзяржаўны ўніверсітэт імя Францыска Скарыны, Санкт-Пецярбургскі дзяржаўны эканамічны ўніверсітэт, Еўразійскі нацыянальны ўніверсітэт імя Л.М. Гумілёва, Усходне-Казахстанскі ўніверсітэт імя Сарсена Аманжолава, Нацыянальны ўніверсітэт Узбекістана імя Мірзо Улугбека і інш.

Арганізатарамі алімпіяды выступілі ФГіГ БДУ, Беларускае геаграфічнае таварыства і Казахстанскае нацыянальнае геаграфічнае таварыства. Мерапрыемства было накіравана на актывізацыю міжнароднага супрацоўніцтва ў галіне геаграфічных ведаў і стварэнне адзінага адукацыйна-інфармацыйнага асяроддзя ў сферы навук аб Зямлі.

Надзея Нікалаева
Звязда, 19 чэрвеня 2023