У апошнія дзесяць гадоў склалася надзвычай актыўнае партнёрства Інстытута літаратуры і мастацтва імя М.А.Ауэзава Камітэта навукі Міністэрства адукацыі і навукі Рэспублікі Казахстан з беларускімі пісьменнікамі, літаратуразнаўцамі, з беларускімі мас-медыя, у прыватнасці, з Выдавецкім домам «Звязда», выданнямі, якія выходзілі на яго «пляцоўцы» ці выходзяць зараз. Як сведчанне — і сумесныя кніжныя праекты, спецыяльныя «казахстанскія» выпускі часопісаў, шматлікія публікацыі на старонках газет «Звязда», «Літаратура і мастацтва», у дадатку да «Звязды» «Союз Евразия». 

Падсумоўваючы гэтую працу на пэўным адрэзку творчых стасункаў, Выдавецкі дом «Звязда» адзначыў сваімі Дыпломамі генеральнага дырэктара Інстытута літаратуры і мастацтва імя М.А.Аўзэава КН МАН Рэспублікі Казахстан, члена-карэспандэнта Нацыянальнай акадэміі навук Рэспублікі Казахстан, заслужанага дзеяча Казахстана, доктара філалагічных навук Кенжэхана Слямжанулы Матыжанава, а таксама дэкана філалагічнага факультэта Казахскага нацыянальнага ўніверсітэта імя аль-Фарабі, члена-карэспандэнта НАН Рэспублікі Казахстан, доктара філалагічных навук, прафесара Баян Умірбекаўну Джалдасбекаву. 

Сяргей Шычко
Звязда, 14 сакавіка 2022