Пачатак акцыі быў прымеркаваны да штогадовага Міжнароднага дня другаснай перапрацоўкі, які адзначаўся 15 лістапада. "Тыдзень без пластыка" працягнецца па 22 лістапада. Яе мэта — прыцягнуць увагу грамадскасці і прамысловых структур да рэцыклінгу (працэсу перапрацоўкі адходаў). 

Удзельнікам акцыі прапануецца на працягу тыдня не выкідваць выкарыстаныя пластыкавыя пакеты і тару, а складаць іх. Так, лічаць арганізатары, можна будзе наглядна ацаніць, колькі пластыка чалавек купляе і ці трэба яму набываць такую колькасць упакоўкі.

"Маленькі пластыкавы пакет, у які нам у магазіне клапатліва кладуць агародніну, бутэлька з-пад напою, плёнка, у якую загортваюць садавіну, — усё гэта раскладаецца больш за 300 гадоў.

Але гэта першае, што адпраўляецца ў сметнік, а потым у велізарнай колькасці трапляе на гарадскія звалкі. Гэтыя горы пластыка забруджваюць зямлю, атручваюць грунтавыя воды, адмоўна ўплываюць на змену клімату", — адзначаецца ў паведамленні, апублікаваным на "Зялёным партале".

Удзельнікам акцыі прапануецца на працягу тыдня весці дзённік, апісваючы кожны пражыты дзень, і да 20 лістапада выслаць запісы на адрас: pressgreenbel@gmail.com. Арганізатары акцыі абяцаюць падрыхтаваць цікавы выніковы матэрыял і апублікаваць яго на "Зялёным партале".

БелаПАН
Мінск, 18 лістапада 2015