Беларускі фонд культуры (БФК) плануе ўстанаўліваць памятныя знакі аб вёсках, якія зніклі, у тых месцах, дзе яны былі.

"На знаках будзе размешчана інфармацыя з назвай вёсак і, магчыма, пералічана некалькі сем`яў, якія пражывалі ў іх", - удакладніў Анатоль Бутэвіч.

У сваю чаргу старшыня БФК, галоўны рэдактар "Краязнаўчай газеты" Уладзімір Гілеп паведаміў, што ў 2014 годзе газета на сваіх старонках разаўе ініцыятыву па стварэнню ў раённых цэнтрах, сельскіх раёнах і аграгарадках зямляцтваў. "Зямляцтвы стануць своеасаблівай формай вяртання выхадцаў з раёнаў і вёсак, а цяпер жыхароў іншых населеных пунктаў Беларусі і краін замежжа на радзіму, да каранёў радавога дрэва. Так мы хочам вырашыць праблему адраджэння гісторыі населеных пунктаў Беларусі і іх развіццё ў будучым", - сказаў ён.

"Краязнаўчая газета" Беларускага фонду культуры - адзінае агульнанацыянальнае выданне, прысвечанае краязнаўству і вывучэнню асаблівасцей розных рэгіёнаў Беларусі. Рэдакцыя газеты акрамя даследчай дзейнасці займаецца таксама правядзеннем уласных акцый. Так, быў арганізаваны збор сродкаў на рэстаўрацыю фрэсак Спаса-Ефрасіннеўскага манастыра ў Полацку, збор і перадача кніг беларускіх пісьменнікаў у сельскія бібліятэкі, фіксацыя каардынат вёсак, якія зніклі. У студзені 2014 года газета святкуе выхад у свет свайго 500-га нумара.

28 студзеня 2014, Мінск
Міхаіл Маціеўскі - БЕЛТА