Міжнароднае рэйтынгавае агенцтва Fitch панізіла рэйтынг фінансавай устойлівасці найбуйнейшага беларускага страхоўшчыка — Беларускага рэспубліканскага ўнітарнага страхавога прадпрыемства "Белдзяржстрах" на адну ступень, да "B-" з "B", прагноз "негатыўны", гаворыцца ў паведамленні Fitch.
Агенцтва панізіла таксама рэйтынг дзяржаўнай страхавой кампаніі "Белэксімгарант" да "B-" з "B", прагноз "негатыўны".
"Паніжэнне адлюстроўвае змену ацэнкі Fitch адносна суверэнных і краінавых рызыкаў", — гаворыцца ў паведамленні.
Fitch таксама выказала занепакоенасць з-за канцэнтрацыі актываў страхоўшчыкаў у банкаўскай сістэме Беларусі.
На гэтым тыдні Fitch панізіла доўгатэрміновыя рэйтынгі дэфолту эмітэнта (РДЭ) шасці буйных беларускіх банкаў — "Белгазпрамбанка", "Беларусбанка", "Белінвестбанка", "Белзнешэканамбанка", "БПС-Банка" і "Банка ВТБ" (Беларусь), прагноз па рэйтынгах застаўся "негатыўным". Рэйтынгі банкаў паніжаныя на адну ступень — да "B-" з "B". Агенцтва таксама пагоршыла прагноз па рэйтынгах "БТА Банка" (Беларусь) да "негатыўнага" са "стабільнага", пацвердзіўшы рэйтынг на ўзроўні "B-".
БелаПАНМінск, 5 жніўня 2011
