Мерапрыемства прайшло 28 ліпеня ў Душанбэ ў рамках міжнароднай універсальнай выставы-кірмашу "Таджыкістан-2017".

Дэлегацыю беларускіх дзелавых колаў на форуме ўзначальваў намеснік старшыні Беларускай гандлёва-прамысловай палаты Сяргей Нябешка. У склад беларускай гандлёвай місіі ўваходзілі прадстаўнікі вядучых машынабудаўнічых холдынгаў "БелАЗ", "МАЗ", "Амкадор", "Гомсельмаш", "БелОМА", а таксама УП "Мінскінтэркапс", ЗАТ "Мінскі завод безалкагольных напояў", ТАА "Пажснаб".

На беларускім стэндзе была прэзентаваная сельскагаспадарчая тэхніка і абсталяванне, спецыяльная тэхніка на базе шасі "МАЗ", прадукцыя машына- і прыборабудавання, харчовай і фармацэўтычнай прамысловасці і іншых галін.

Афганскую дэлегацыю з прадстаўнікоў больш як 60 кампаній ўзначаліў першы намеснік старшыні праўлення ГПП Афганістана Алоказай Хан Джан.

З таджыкскага боку ў мерапрыемствах выставы і форуму ўзялі ўдзел члены Гандлёва-прамысловай палаты Таджыкістана, Нацыянальнай асацыяцыі малога і сярэдняга бізнесу Таджыкістана, прадстаўнікі міністэрстваў, дзяржаўных і прыватных арганізацый.

Бізнес-форум быў арганізаваны гандлёва-прамысловымі палатамі трох краін і пасольствам Беларусі ў Таджыкістане пры падтрымцы беларускага і таджыкскага урадаў. Форум праводзіўся для пашырэння гандлёва-эканамічнага супрацоўніцтва Беларусі і Таджыкістана, а таксама наладжвання дзелавых кантактаў з Афганістанам, адзначылі ў прэс-службе.

У адкрыцці пленарнага пасяджэння бізнес-форуму ўзялі ўдзел пасол Беларусі ў Таджыкістане і Афганістане па сумяшчальніцтве Алег Іваноў, пасол Афганістана ў Таджыкістане Залмай Юнусі, кіраўнікі гандлёвых палат і іншыя афіцыйныя асобы.

29 ліпеня ў пасольстве Беларусі ў Таджыкістане адбылася рабочая сустрэча намесніка старшыні БелГПП Сяргея Нябешкі з кіраўнікамі Гандлёва-прамысловай палаты Афганістана. Паводле вынікаў перамоў дасягнутая дамоўленасць аб падпісанні ў жніўні 2017 года ў Мінску пагаднення аб супрацоўніцтве паміж гандлёвымі палатамі дзвюх краін.

Таццяна Каравянкова, БелаПАН
Мінск, 1 жніўня 2017