У чэрвені 2024 года трэці раз стартуе сумесны беларуска-расійскі культурна-адукацыйны праект "Поезд Памяці", ініцыяваны Саветам Федэрацыі Федэральнага Сходу Расійскай Федэрацыі і Саветам Рэспублікі Нацыянальнага сходу Рэспублікі Беларусь. У 2022-2023 гадах гэта патрыятычная акцыя прадаставіла ўнікальную магчымасць 400 дзецям з Беларусі, Расіі, Арменіі і Кыргызстана - навучэнцам дзясятых класаў, актывістам, пераможцам алімпіяд і ваенна-патрыятычных конкурсаў - прыняць удзел у памятна-мемарыяльных мерапрыемствах, звязаных з падзеямі Вялікай Айчыннай вайны.

"У 2022 годзе ў праекце прынялі ўдзел па 100 школьнікаў з Беларусі і Расіі, у 2023 годзе - з Беларусі 70 удзельнікаў, Расіі - 90, Арменіі і Кыргызстана - па 20. У гэтым годзе да праекта "Поезд Памяці" акрамя моладзі з Беларусі, Расіі, Арменіі і Кыргызстана далучаюцца прадстаўнікі Азербайджана. Цяпер прадаўжаецца перагаворны працэс па пашырэнні геаграфіі краін - удзельніц праекта. Гэта наглядны прыклад таго, што мы падзяляем агульныя каштоўнасці аб гістарычнай памяці, - расказалі ў Савеце Рэспублікі. - У лютым 2024 года праведзены арганізацыйны камітэт, створаны ў мэтах падрыхтоўкі сумеснага беларуска-расійскага праекта "Поезд Памяці". У яго ўвайшлі прадстаўнікі Савета Рэспублікі, рэспубліканскіх органаў дзяржаўнага кіравання, аблвыканкамаў, Мінскага гарвыканкама і шэрага арганізацый".

У рамках праекта плануецца наведванне 13 населеных пунктаў, з якіх 7 знаходзяцца на тэрыторыі Расіі, 6 - на тэрыторыі Беларусі. Поезд наведае такія гарады нашай краіны, як Брэст, Гродна, Полацк, Магілёў, Гомель, Мінск. Рэалізацыя праекта будзе ажыццяўляцца за кошт сродкаў Саюзнай дзяржавы.

"З 1 лютага 2024 года ў беларускіх установах агульнай сярэдняй адукацыі стартаваў адбор удзельнікаў праекта "Поезд Памяці". Ён завершыцца да 1 красавіка. Па выніках конкурсу будуць вызначаны лепшыя з лепшых, найбольш актыўныя, мэтанакіраваныя і таленавітыя прадстаўнікі беларускай моладзі, - удакладнілі ў верхняй палаце парламента. - Арганізатарам рэспубліканскага конкурсу "Я патрыёт сваёй краіны" з`яўляецца Міністэрства адукацыі. Конкурс праходзіць у 4 этапы (ва ўстановах адукацыі, раённы, абласны і рэспубліканскі). Ён уключае выпрабаванні: партфоліа, візітная картка, эсэ "Аб той вясне…". Удзельнікі - навучэнцы дзясятых класаў, якія дасягнулі высокіх паказчыкаў у вучэбнай, грамадскай, спартыўнай, валанцёрскай дзейнасці, лідары вучнёўскага самакіравання, актывісты грамадскіх арганізацый, навучэнцы ваенна-патрыятычных, кадэцкіх класаў, выхаванцы ваенна-патрыятычных клубаў. Па выніках будуць вызначаны па 8 прадстаўнікоў з рэгіёнаў".

Цяпер ажыццяўляецца дэталёвая прапрацоўка праграмы знаходжання і ўсіх мерапрыемстваў па арганізацыі беларуска-расійскага культурна-адукацыйнага праекта "Поезд Памяці".

13 сакавіка 2024, Мінск
БЕЛТА