За два гады праекта "Белорусский вояж" рэспубліку наведалі 16 тыс расійскіх турыстаў, паведаміў на пасяджэнні працоўнай групы па турызме ў рамках Саюзнай дзяржавы першы намеснік начальніка пасажырскай службы БЧ Канстанцін Баяр.

Сумесны праект РЧ і БЧ стартаваў у жніўні 2022 года, з таго часу было арганізавана каля двух дзесяткаў чыгуначных круізаў з Расіі ў Беларусь. Цягнікі едуць па двух маршрутах: Масква – Мінск – Брэст і Масква – Мінск – Гродна. У гэтых гарадах для турыстаў арганізуюць экскурсіі з наведваннем Брэсцкай крэпасці, Белавежскай пушчы, Старога замка ў Гродне, Мірскага і Нясвіжскага замкаў і іншых славутасцей рэспублікі.

Вагоны цягніка, у якіх падарожнічаюць турысты, абсталяваны спальнымі купэ і душавымі кабінамі. У саставе ёсць вагон-рэстаран.

Прадстаўнік БЧ адзначыў, што за ўвесь мінулы год перавозкі чыгуначным транспартам у рамках Саюзнай дзяржавы выраслі на 24%.

"Было перавезена больш за 2 млн пасажыраў. Я думаю, што гэта не мяжа. З кожным днём у нас узрастае попыт на рэгулярныя і святочныя перавозкі. З РЧ на завяршальнай стадыі знаходзіцца пакет дадатковых цягнікоў, якія будуць курсаваць на навагоднія святы", - расказаў Баяр.

Ён таксама нагадаў, што з 1 лістапада паміж Мінскам і Масквой пачне курсаваць дадатковая "Ласточка", білеты на яе ўжо паступілі ў продаж.

Пасля чаго дадаў, што рэйсы, якія выконваюць хуткасныя электрацягнікі паміж сталіцамі, займаюць 24% ад усіх перавозак БЧ.

Баяр заявіў, што зараз паміж Беларуссю і Расіяй курсуюць 44 цягнікі ў розных напрамках. Самыя запатрабаваныя і запоўненыя – Масква і Санкт-Пецярбург. Таксама папулярнасцю карыстаюцца рэйсы да Мурманска, Архангельска і Мінеральных вод.

Мінск, 26 верасня 2024
Sputnik