Польшча гатова аплаціць вяртанне мігрантаў з Беларусі на радзіму - прэм`ер Маравецкі

Еўрасаюз таксама павінен унесці свой уклад у вырашэнне крызісу, лічыць Маравецкі, бо мігранты не маюць намеру заставацца ў Польшчы, а хочуць трапіць у Германію або Нідэрланды.

Польшча прапанавала выдзеліць грошы на вяртанне мігрантаў з Беларусі на радзіму, праўда, толькі ў тым выпадку, калі Аляксандр Лукашэнка "праявіць добрую волю", заявіў прэм`ер-міністр суседняй краіны Матэвуш Маравецкі польскім СМІ.

"Я лічу, мы павінны, дзякуючы нашай салідарнай і рашучай палітыцы абароны граніц, дабіцца вяртання мігрантаў дадому. Мы можам дапамагчы ім у гэтым і прафінансаваць рэйсы з Беларусі, з Мінска ў Багдад, у Эрбіл, у Стамбул або куды-небудзь яшчэ", - сказаў польскі прэм`ер.

Пры гэтым Маравецкі падкрэсліў, што Варшава не збіраецца мяняць пазіцыю ў дачыненні да мігрантаў і плануе рашуча абараняць сваю тэрытарыяльную цэласнасць.

Па словах кіраўніка ўрада, ЕС таксама павінен унесці свой уклад, таму што бежанцы не хочуць заставацца ў Польшчы, яны імкнуцца ў Германію і Нідэрланды. "Але мы не хочам чакаць Еўрасаюз", - дадаў Маравецкі.

Крытыка Меркель

Матэвуш Маравецкі раскрытыкаваў в.а. канцлера ФРГ Ангелу Меркель за тэлефонныя размовы з беларускім прэзідэнтам Аляксандрам Лукашэнкам.

"Еўрасаюз павінен удзельнічаць у пошуку дыпламатычнага рашэння. Але калі канцлер Меркель патэлефанавала спадару Лукашэнку, яна ўнесла ўклад у легітымізацыю яго рэжыму", - заявіў Маравецкі ў інтэрв`ю агенцтву ДПА.

На яго думку, прэзідэнт Беларусі "злоўжыў" размовай з Меркель, заявіўшы аб яе згодзе перавезці 2000 мігрантаў у Германію і іншыя краіны.

Міграцыйны крызіс

Сітуацыя на беларуска-польскай мяжы абвастрылася 8 лістапада, калі ў лесе каля пункта пропуску "Брузгі" з беларускага боку сабралася вялікая колькасць бежанцаў.

Праз тыдзень яны пакінулі стыхійны лагер і накіраваліся непасрэдна да пагранперахода, дзе частка мігрантаў паспрабавала прарвацца ў Польшчу. У адказ на камяні і палкі, польскія сілавікі прымянілі вадамёты і слёзатачывы газ.

Пасля людзей размясцілі ў лагістычным цэнтры непадалёк. У пятніцу яго наведаў прэзідэнт Беларусі Аляксандр Лукашэнка. Ён заявіў, што агулам у рэспубліцы можа знаходзіцца да 5 тысяч мігрантаў з краін Блізкага Усходу. І каля тысячы, паводле яго слоў, добраахвотна вярнуліся на радзіму: як эвакуацыйнымі рэйсамі, так і самі.

Бежанцы, якія знаходзяцца ў гандлёва-лагістычным цэнтры, у большасці сваёй пакуль не жадаюць вяртацца на радзіму і чакаюць гуманітарнага калідора ў краіны ЕС.

Мінск, 28 лістапада 2021
Sputnik