Беларусь і Расія рыхтуюцца стварыць новы спадарожнік, які, па планах, можа быць запушчаны на арбіту ў 2023 годзе, распавёў акадэмік Пётр Віцязь журналістам напярэдадні Дня касманаўтыкі.
Працоўнае праектаванне мяркуюць пачаць з 2020 года. Беларускія прадпрыемствы створаць оптыка-электронную мэтавую апаратуру і сумесна з расійскімі распрацуюць наземную інфраструктуру.
Што новы спадарожнік зможа бачыць з космасу?
Асаблівасць новага спадарожніка ў пеленгу больш высокай раздзяляльнай здольнасці. Ён зможа разгледзець прадмет памерам у 35 сантыметраў.
"Гэта будзе сумесны расійска-беларускі апарат, якім змогуць кіраваць і прымаць інфармацыю расіяне і мы", - распавёў акадэмік Пётр Віцязь.
У Беларусі ёсць ужо тры спадарожнікі - спадарожнік дыстанцыйнага зандзіравання, спадарожнік сувязі і навучальны спадарожнік, які створаны ў БДУ.
Новы спадарожнік будзе адрознівацца менавіта раздзяляльнай здольнасцю. Ён спатрэбіцца ў картаграфіі, у будаўніцтве гарадоў, дамоў, у земляробстве, лясной гаспадарцы. Можна будзе ацаніць нават стан зялёных насаджэнняў у Мінску і на прылеглай тэрыторыі. Дзесяткі і сотні праблем дапаможа вырашыць новы спадарожнік, перакананы Віцязь.
"Спадарожнікі з раздзяляльнай здольнасцю 2 метры ёсць, але яны раней важылі 6 тон, а наш спадарожнік - 450 кілаграмаў. А кожны кілаграм у космасе - гэта вялікія грошы", - растлумачыў вучоны.
А што з БелКА?
Запушчаны ў 2012 годзе спадарожнік адздымаў за гэтыя гады больш за 300 мільёнаў квадратных кіламетраў тэрыторыі. Прытым разліковы тэрмін яго эксплуатацыі быў пяць гадоў. Тэхнічны стан спадарожніка пастаянна аналізуецца, і прагнозны тэрмін эксплуатацыі спадарожніка працягнулі да 2021 года.
Адказваючы на пытанне аб тым, ці акупіліся папярэднія спадарожнікі, эксперты адзначылі - ад выкарыстання новых тэхнічных рашэнняў, якія былі атрыманы пры стварэнні спадарожніка, і ад эксплуатацыі БКА зароблена на 18 мільёнаў долараў больш, чым выдаткавана.
"Мы лічым, колькі выдаткавана і колькі атрымана. Станоўчая розніца - больш за 18 мільёнаў долараў. Можна выдаткаваць трыльёны, галоўнае, каб атрымана было больш", - перакананы акадэмік.
Трохі футурыстычных прагнозаў
Калісьці Віцязь уразіў беларусаў сваёй заявай аб тым, што людзі тэарэтычна здольныя пабудаваць ліфт на Месяц.
"Ёсць рашэнні, як пабудаваць ліфт на месяц. Але тэхнічна і эканамічна гэта пакуль нявыгадна. Ёсць шэраг тэхналагічных цяжкасцяў. Але калі казаць пра перспектыву, чаму не? Тое, што ўчора было фантазіяй, у шэрагу выпадкаў ужо спраўдзілася. Гэта датычыцца і тэлефоннай сувязі, і руху транспарту. Калі не думаць пра заўтрашні дзень, які пачынаецца з фантазій, не будзе прагрэсу. Матэрыялы ў лабараторных умовах атрыманы, эксперыменты праведзены, але як будзе развівацца праект, будзе залежаць не толькі ад тэхнічнай, але і ад эканамічнай сферы", - распавёў Віцязь.
Ён прывёў у прыклад Ілона Маска, якому паспяхова ўдаецца прыцягваць на рэалізацыю сваіх праектаў інвестыцыі. І звярнуўся да маладога пакалення.
"Моладзь сёння ўспрымае космас зусім інакш, і нават школьнікі прапануюць цікавыя праекты", - адзначыў ён.
А падбадзёрваючы беларусаў, якія не вераць у перспектывы тэхнічнага прагрэсу, сказаў: калісьці ў нашай краіны не было ні аднаго спадарожніка, а зараз іх тры.
Sputnik, 10 красавіка2019
