Сёлета Беларусь плануе імпартаваць 20,4 млрд. кубаметраў прыроднага газу, паведаміў 6 сакавіка на прэс-канферэнцыі ў Мінску першы намеснік міністра энергетыкі Беларусі Леанід Шэнец.
Ён нагадаў, што ў 2013 годзе было закуплена 19,5 млрд. кубаметраў. "Гэтыя аб`ёмы ў нас узгоднены з "Газпромам", іх дастаткова для таго, каб забяспечыць эканоміку і энергетыку ў поўным аб`ёме, — адзначыў ён. — Мы адыходзім ад імпарту электраэнергіі — нам выгадна выпрацоўваць яе на базе ўласных магутнасцяў".
Прадстаўляючы журналістам новую канцэпцыю энергабяспекі краіны, Шэнец паведаміў: "Укараняючы высокаэфектыўныя генеруючыя магутнасці, мы зніжаем нашы расходы і кошт рэсурсаў для рэальнага сектара эканомікі. Такая пазіцыя будзе захоўвацца і ў будучыні. Сёння прымаюцца кропкавыя рашэнні для асобных буйных спажыўцоў — цэментных прадпрыемстваў, ААТ "Гомельшкло", для якіх велічыня зніжэння кошту рэсурсаў значна вышэйшая, чым для астатніх. Для іх асабліва важны ўвод сучасных, высокаэфектыўных магутнасцяў, аптымізацыя рэжыму працы".
БелаПАН, 6 сакавіка 2014
