Як паведамілі ў Міністэрстве фінансаў, дзве названыя фінансавыя структуры выступяць таксама арганізатарамі серыі сустрэч у Сінгапуры і Ганконгу прадстаўнікоў беларускага ўрада з міжнароднымі інвестарамі з мэтай прэзентацыі (роад-шоу) выпуску еўрааблігацый.

У прыватнасці, з 27 па 30 лістапада Сінгапур і Ганконг наведае беларуская дэлегацыя ў складзе міністра фінансаў Андрэя Харкаўца, міністра эканомікі Мікалая Снапкова, першага намесніка старшыні праўлення Нацыянальнага банка Юрыя Алымава і старшыні праўлення Банка развіцця Сяргея Румаса.

У верасні Харкавец паведамляў, што Беларусь можа размясціць еўрабонды на 500-600 млн. долараў у Еўропе або азіяцкім рэгіёне ў 2013 годзе. Пры гэтым роад-шоу еўрабондаў планавалася правесці ў лістападзе.

Прэм`ер-міністр Міхаіл Мясніковіч 16 лістапада пацвердзіў намер Беларусі размясціць еўрабонды. "Так, мы настроены на размяшчэнне буйнога пакета еўрабондаў у найбліжэйшы час. Гэта будзе ў пачатку гэтага года, а работу мы пачнем у снежні", — сказаў Мясніковіч.

"Мы ведаем, як гэта рабіць. У нас ёсць партнёры, але хацелася б, каб іх было больш. Мы пры ўсіх абставінах выконваем усе ўзятыя на сябе абавязацельствы і будзем рады новым цікавым прапановам", — адзначыў кіраўнік урада. Пры гэтым ён паведаміў, што замежныя кансультанты далі сваю ацэнку, і ў іх не было прэтэнзій і заўваг.

Міжнародны валютны фонд прывітаў намер Беларусі зноў выйсці на знешні рынак еўрааблігацый. "Гэта дазволіла б атрымаць дадатковае знешняе фінансаванне", — сказаў кіраўнік місіі МВФ Дэвід Хофман 29 кастрычніка на брыфінгу ў Мінску. Разам з тым, прадоўжыў Хофман, урад павінен клапаціцца пра тое, каб гэтае пазычанне адбывалася з мінімальнымі выдаткамі, па мінімальнай цане. На наступны перыяд урад павінен таксама дакладна адсочваць агульны ўзровень доўгу, дадаў кіраўнік місіі МВФ. "Але ў кароткатэрміновым перыядзе мы б падтрымалі такое пазычанне", — адзначыў Хофман.

Нагадаем, у ліпені 2010 года Беларусь размясціла дэбютныя еўрааблігацыі на 600 млн. долараў са стаўкай купона 8,75% гадавых і пагашэннем у 2015 годзе. У жніўні — даразмясціла еўрабонды на 400 млн. долараў, даходнасць па паперах склала 8,251% гадавых. У снежні 2010 года Беларусь размясціла ў Расіі двухгадовыя аблігацыі на 7 млрд. расійскіх рублёў. Стаўка купона аблігацый склала 8,7% гадавых.

19 студзеня 2011 года Беларусь размясціла сямігадовыя еўрааблігацыі на 800 млн. долараў пад 8,95% гадавых. Арганізатарамі і лід-менеджарамі выпуску сталі BNP Paribas, Deutsche Bank, RBS і "Ашчадбанк Расіі". Паперы размяшчаліся па правіле Reg S.

Аляксей Арэшка, БелаПАН
Мінск, 23 лістапада 2012