Інфляцыя паводле вынікаў кастрычніка ў гадавым выражэнні склала 5,9%, паведамляе Белстат.
Калі параўноўваць спажывецкія цэны ў кастрычніку з вераснёўскімі, то ў сярэднім яны выраслі на 0,5%. Больш за ўсё падаражэлі прадукты харчавання: плюс 0,7% за месяц і 7,2% у гадавым выражэнні. Паслугі і нехарчовыя тавары за кастрычнік сталі даражэй на 0,3%, а да кастрычніка мінулага года, адпаведна – на 6% і 4,1%.
Раней Белстат апублікаваў даныя аб змяненні цэн вытворцаў прамысловай прадукцыі.
У сегменце спажывецкіх тавараў за кастрычнік яны ўпалі на 0,2%, а ў параўнанні са снежнем 2023-га – выраслі на 4,9%.
У верасні ў цэлым інфляцыя склала 6%. Цэны на прадукты павялічыліся на 0,5% (у параўнанні са жніўнем), а ў гадавым выражэнні – на 7,5%. Па выніках мінулага года інфляцыя ў краіне склала 5,8%. У канцы гэтага года, паводле планаў улад, яна павінна быць не больш за 6%.
