Беларусь разлічвае ў бліжэйшы час зрабіць вялікі рывок у пастаўках сваёй сельскагаспадарчай прадукцыі на амерыканскі рынак. Як расказаў у ходзе рабочага візіту ў ЗША міністр сельскай гаспадаркі і харчавання Беларусі Леанід Заяц, ставіцца задача ўжо да канца бягучага года давесці аб`ём такіх паставак да $100 млн, у той час як цяпер ён ацэньваецца толькі $2,5 млн.

Сама па сабе паездка кіраўніка беларускага Мінсельгасхарча - ужо своеасаблівы прарыў. Візітаў міністэрскага ўзроўню з Беларусі ў ЗША не было сама меней дзесяць гадоў. Цяпер Леанід Заяц не толькі сустрэўся ў Вашынгтоне з кіраўніцтвам міністэрстваў сельскай гаспадаркі і гандлю ЗША, але і наведаў некалькі ключавых з пункту гледжання сельскай гаспадаркі штатаў краіны. У ходзе візіту ўжо адбылося падпісанне першага своеасаблівага пагаднення аб супрацоўніцтве паміж Магілёўскай вобласцю і штатам Паўночная Дакота. "Нас усюды гасцінна і ветліва сустракаюць", - падкрэсліў кіраўнік беларускай дэлегацыі.

У цэлым, паводле яго слоў, візіт праходзіць вельмі плённа. На перагаворах у Вашынгтоне ставілася пытанне аб доступе на амерыканскія рынкі шырокага асартыменту беларускай прадукцыі, уключаючы льняное валакно і вырабы з лёну, сыры і іншую малочную прадукцыю, сокі і морсы, - усяго 11 таварных пазіцый. З боку ўлад ЗША пытанне сустрэла поўнае разуменне, цяпер чакаецца яго далейшая прапрацоўка з амерыканскімі дзелавымі коламі, сказаў міністр.

У Паўночнай Дакоце, паводле яго слоў, з кіраўніцтвам штата абмяркоўваліся перспектывы супрацоўніцтва ў галіне мясной і малочнай жывёлагадоўлі. "Нас цікавяць пытанні ўзнаўлення, паляпшэння пароды, - растлумачыў Леанід Заяц. - Мы думаем завозіць семявы матэрыял".

Ішла размова і аб наладжванні на базе Паўночнадакоцкага ўніверсітэта праграмы стажыровак і перападрыхтоўкі кадраў для беларускай жывёлагадоўлі, уключаючы выкладчыкаў профільных ВНУ. "У гэтым пытанні таксама было дасягнута разуменне, і цяпер мы будзем працаваць над тым, каб гэта матэрыялізаваць", - сказаў субяседнік.

Нарэшце, яшчэ адной тэмай, якая абмяркоўвалася ў ходзе візіту, была перспектыва наладжвання ў Беларусі вытворчасці ялавічыны высокай якасці для выхаду на рынкі трэціх краін. Паводле слоў міністра, дамоўленасць аб супрацоўніцтве на гэтым напрамку дасягнута з уладальнікам групы кампаній Rastelli Foods Group Энтані Растэлі. "Ён пабываў ужо ў нас на Гродзенскім мясакамбінаце, і яго вельмі ўразіла гэта прадпрыемства", - сказаў беларускі міністр аб партнёры, чыя фірма пастаўляе прадукцыю, у прыватнасці, у ААЭ і іншыя блізкаўсходнія краіны.

На пытанне аб тым, ці плануецца супрацоўніцтва з ЗША па вытворчасці кармоў, Леанід Заяц адказаў: "Не. У нас ёсць свае напрамкі развіцця кармавой базы з выкарыстаннем толькі бяспечных элементаў. Пры поўнай адсутнасці генетычна мадыфікаваных сартоў у сістэме кормавытворчасці". "Адзінае, што мы тут паглядзім, - гэта тэхналогія вытворчасці соі, а само насенне ўжо ёсць у Рэспубліцы Беларусь", - дадаў міністр. Ён яшчэ раз пацвердзіў, што амерыканскім ГМА ходу ў краіну не будзе.

Беларуская сельскагаспадарчая прадукцыя - у прыватнасці, казеін і некаторыя малочныя тавары - пастаўляецца ўжо ў ЗША. Але аб`ём гэтых паставак у Мінску лічаць зусім недастатковым. Менавіта таму субяседнік сказаў: "Мы так разумеем і разлічваем, што на працягу літаральна двух месяцаў павінны павялічыць свае пастаўкі". А на пытанне аб колькасных арыенцірах адказаў: "Вядома, мы ставім сабе арыенцір. Хоць бы на пачатковым этапе бягучы год завяршыць мільёнаў на 100".

На пытанне аб супрацоўніцтве з ЗША па такой "кароннай" для Беларусі культуры, як бульба, Леанід Заяц адказаў, што на гэтым этапе яго пакуль няма. "Але будзем прагаворваць гэтыя пытанні таксама", - сказаў міністр.

22 мая 2015, Вашынгтон
БЕЛТА - ТАСС