Яна звярнула ўвагу на тое, што ААТ "Беларуськалій" прапануе на рынкі высакаякасную прадукцыю розных відаў. Акрамя таго, добра выбудавана лагістыка, супрацоўнікі аператыўна рэагуюць на сусветныя тэндэнцыі ў гэтай сферы.

Алена Кудравец адзначыла, што ў гэтым годзе прададзена больш як 4 млн т калійных угнаенняў, ёсць кантракты на ліпень і фарміруецца праграма на жнівень. Яна расказала, што павялічаны пастаўкі калійных угнаенняў на экспарт кантэйнерамі. Такім чынам пастаўляецца больш за 100 тыс.т калійных угнаенняў у месяц, што перасягае паказчыкі мінулага года.

Беларускі бок вельмі шчыльна працуе па пастаўках калійных угнаенняў у Бразілію, Кітай, Паўднёва-Усходнюю Азію, развівае еўрапейскі напрамак і пастаўкі ў Афрыку як вельмі перспектыўны рэгіён у будучым.

Гаворачы пра тэндэнцыі на сусветным рынку калійных угнаенняў, Алена Кудравец адзначыла, што расце як попыт, так і цана. Паводле яе слоў, у Бразіліі за 4 месяцы гэтага года попыт вырас прыкладна на 1,2 млн т, а цана - больш як на $50 за тону. Такая тэндэнцыя назіраецца і ў Еўропе, і ў Паўднёва-Усходняй Азіі. "Для многіх кліентаў і нашых партнёраў вялікім адкрыццём з`яўляецца тое, наколькі магутнае і сучаснае прадпрыемства "Беларуськалій", а таксама тое, што мы адзіныя ў свеце за апошнія 20 гадоў пабудавалі і ўвялі ў эксплуатацыю новыя руднікі. На жаль, не ўсе нашы кліенты і партнёры аб гэтым ведалі, ведалі аб той колькасці відаў тавару, яго разнастайнасці, якую мы можам прапанаваць", - сказала яна.

Беларуская калійная кампанія (БКК) была заснавана ў красавіку 2005 года рэспубліканскім унітарным прадпрыемствам "Вытворчае аб`яднанне "Беларуськалій" (са жніўня 2010 года - адкрытае акцыянернае таварыства "Беларуськалій") (Беларусь) і адкрытым акцыянерным таварыствам "Уралкалій" (Расія). У другой палавіне 2013 года кіраўніцтва "Уралкалія" заявіла аб спыненні рэалізацыі сваёй прадукцыі праз сумеснага трэйдара "Беларуская калійная кампанія" (БКК) і адначасовай змене стратэгіі продажаў. Гэта абярнулася негатыўнымі наступствамі для ўсіх удзельнікаў рынку калійных угнаенняў і прывяло да пагаршэння фінансавых рэзультатаў работы вытворцаў хлоркалію.

ААТ "Беларуськалій" з`яўляецца адным з буйнейшых вытворцаў і экспарцёраў калійных угнаенняў у свеце. Паводле даных Міжнароднай асацыяцыі ўгнаенняў, на яго долю прыпадае сёмая частка сусветнага аб`ёму вытворчасці калійных угнаенняў. "Беларуськалій" экспартуе прадукцыю больш як у 70 краін. У склад прадпрыемства ўваходзяць чатыры рудаўпраўленні, а таксама дапаможныя і абслуговыя падраздзяленні. 100 працэнтаў акцый ААТ "Беларуськалій" належыць дзяржаве.

19 чэрвеня 2013 Салігорск
Таццяна Паляжай - БЕЛТА