Пра гэта заявіў намеснік старшыні праўлення Нацбанка Сяргей Калечыц на пашыраным пасяджэнні праўлення ў канцы красавіка (выступленне апублікавана ў майскім нумары "Банковского вестника").
"Па меры стабілізацыі сітуацыі ў эканоміцы і грашова-крэдытнай сферы Нацыянальны банк будзе ажыццяўляць далейшае зніжэнне працэнтных ставак. Пры гэтым яно будзе праводзіцца асцярожна, з тым каб, з аднаго боку, павышаць даступнасць рублёвых рэсурсаў для эканомікі, з іншага — пазбягаць перацёку рублёвых рэсурсаў у валютныя ўклады, пагаршэння знешняга гандлю і парушэння ўстойлівасці валютнага рынку", — заявіў Калечыц.
Нагадаем, у сакавіку Нацбанк аднавіў палітыку зніжэння стаўкі рэфінансавання пасля паўгадавога перапынку, выкліканага перацёкам рублёвых дэпазітаў насельніцтва ў валютныя ўклады восенню 2012 года.
Асноўныя кірункі грашова-крэдытнай палітыкі на 2013 год, зацверджаныя ўказам прэзідэнта № 419, прадугледжваюць, што да канца года стаўка рэфінансавання знізіцца да 13-15%. Сёлета Нацбанк ужо тройчы зніжаў стаўку рэфінансавання: 13 сакавіка — з 30 да 28,5%, 17 красавіка — з 28,5 да 27%, 15 мая — з 27 да 25%.
Прадстаўнікі банкаўскага сектара чакаюць, што Нацбанк не стане рэзка аслабляць грашова-крэдытную палітыку і хуткімі тэмпамі зніжаць стаўку рэфінансавання. Як зазначылі эксперты ў банкаўскіх колах, стаўка рэфінансавання на 1 кастрычніка 2013 года наўрад будзе ніжэй за 20%.
Дзмітрый Заяц,
БелаПАНМінск, 3 чэрвеня 2013
