Кіраўнік беларускага ўрада 13-га студзеня знаходзіўся ў рабочай паездцы ў Баранавічах. Ён пабываў у вытворчым корпусе БВБА, дзе азнаёміўся з тэхналагічным працэсам прамысловай вытворчасці баваўняных тканін. У прыватнасці, Раман Галоўчанка наведаў прадзільную вытворчасць, ткацкую і аддзелачную фабрыкі. Затым адбылася нарада з удзелам прэм`ер-міністра, на якой абмяркоўваліся вынікі работы прадпрыемства ў 2022 годзе і рэалізацыя стратэгіі развіцця аб`яднання да 2028 года.

"Сёння мы разглядалі першыя вынікі рэалізацыі гэтага дакумента, прынятага ў красавіку мінулага года. Мы бачым, што паказчыкі, у прынцыпе, па прадпрыемстве сур`ёзна палепшыліся. Вядома, яшчэ пакуль далёка да выканання задачы выхаду на эфектыўную, рэнтабельную работу. Але справа была крыху запушчана, таму за 5-7 месяцаў вынікаў не дасягнуць. Адбылася жорсткая, шчырая размова. Мы бачым, што трэба падкарэкціраваць, што трэба прадаўжаць мадэрнізацыю прадпрыемства. Ніякіх размоў аб тым, што яно будзе зачынена, перапрафілявана або яшчэ штосьці, няма. Гэта нават не разглядаецца. Хоць такія меркаванні раней былі. Гэта абсалютна не дзяржаўны падыход. Гэта актыў, які можна ператварыць у прыбытак", - сказаў прэм`ер-міністр.

Прадпрыемства, паводле яго слоў, даволі значнае для горада і рэспублікі, каб пайсці па шляху найменшага супраціўлення і купляць ужо гатовыя суравыя тканіны. "Такая версія была, але зноў мы вяртаемся да ўрокаў мінулага года. Так, сёння можам купляць, а калі заўтра штосьці здарыцца, што тады? Таму не трэба адмятаць і адмаўляцца ад таго, што ўжо створана. Гэта, у прынцыпе, таксама аснова нашай незалежнасці ў сферы забеспячэння і сябе, і нашых партнёраў усімі відамі тканін", - падкрэсліў Раман Галоўчанка.

"Стратэгія ёсць. Яна будзе рэалізоўвацца далей. Думаю, што ў бліжэйшы час мы істотна ўзмоцнім кадравы складнік і прымем іншыя меры для таго, каб аптымізаваць работу прадпрыемства. Тут чатыры фабрыкі, не ўсе яны маюць добрую рэнтабельнасць. Трэба паглядзець тэхнічна і арганізацыйна, якім чынам павысіць эфектыўнасць вытворчасці на прадзільнай і ткацкай вытворчасцях", - рэзюмаваў кіраўнік урада.

У нарадзе прынялі ўдзел намеснік прэм`ер-міністра Пётр Пархомчык, старшыня Брэсцкага аблвыканкама Юрый Шулейка, старшыня канцэрна "Беллегпрам" Таццяна Лугіна.

ААТ "Баранавіцкае вытворчае баваўнянае аб`яднанне" ("Блакiт") у 2023 годзе адзначыць 60 гадоў з моманту ўтварэння. Сёння гэта адзін з буйнейшых вытворцаў тэкстыльнай прадукцыі ў Еўропе і СНД. БВБА пазіцыянуе сябе як прадпрыемства поўнага цыкла: самастойна перапрацоўвае бавоўну, вырабляе пражу, выпускае гатовыя швейныя вырабы. У склад ААТ уваходзяць прадзільная, ткацкая, аддзелачная і швейная фабрыкі.

13 студзеня 2023, Баранавічы
БЕЛТА