Нацбанк Беларусі заяўляе пра гатоўнасць ўзмацніць жорсткасць грашова-крэдытнай палітыкі, выкарыстоўваючы ўсе наяўныя эканамічныя інструменты.
"У мэтах стабілізацыі сітуацыі на валютным рынку і строгага выканання пагаднення з Антыкрызісным фондам ЕўрАзЭС Нацыянальны банк Беларусі робіць усе неабходныя захады па ўзмацненні жорсткасці грашова-крэдытнай палітыкі", — гаворыцца ў паведамленні ўпраўлення інфармацыі галоўнага банка краіны.
Адзначаецца, што з 1 чэрвеня 2011 года Нацыянальным банкам поўнасцю спынена эмісійнае крэдытаванне дзяржаўных праграм. Рэфінансаванне банкаў ажыццяўляецца толькі праз стандартныя аперацыі рэгулявання ліквіднасці (на рынкавых умовах і на кароткія тэрміны).
"У выпадку ўзнікнення патрэбы ў кароткатэрміновым падтрыманні ліквіднасці банкі выкарыстоўваюць магчымасці рэфінансавання ў Нацыянальным банку праз пастаянна даступныя інструменты (крэдыт авернайт і своп авернайт), а таксама на рэгулярных ламбардных крэдытных аўкцыёнах", — адзначаюць у Нацбанку.
Пры гэтым па меры павышэння стаўкі рэфінансавання і ставак па інструментах рэгулявання ліквіднасці банкаў кошт рэфінансавання для банкаў пастаянна павялічваецца.
Стаўка рэфінансавання Нацыянальнага банка з пачатку 2011 года павышана на 16,5 працэнтнага пункта да 27% гадавых. Стаўкі па пастаянна даступных аперацыях падтрымкі ліквіднасці павялічаны на 21 працэнтны пункт да 37% гадавых. На ламбардных аўкцыёнах рэсурсы банкам даюцца Нацбанкам па максімальным кошце, набліжаным да працэнтных ставак па пастаянна даступных аперацыях рэфінансавання.
"Найбліжэйшым часам у межах распрацаванага ўрадам і Нацыянальным банкам комплексу мер па выйсці на адзіны курс беларускага рубля ўзмацненне грашова-крэдытнай палітыкі атрымае працяг. Пры гэтым задача будзе вырашацца ўсімі наяўнымі ў Нацыянальнага банка эканамічным інструментамі", — падкрэсліваецца ў паведамленні.
Узмацненне жорсткасці Беларуссю грашова-крэдытнай палітыкі з`яўляецца адной з умоў выдзялення крэдыту Антыкрызіснага фонду ЕўрАзЭС у 3 млрд. долараў ЗША. Беларусь атрымае грошы некалькімі траншамі на працягу трох гадоў: 1,24 млрд. долараў у 2011 годзе, прыблізна 800 млн. — у 2012-м і 1 млрд. — у 2013-м.
Першыя 800 млн. долараў у межах крэдыту ў Беларусь паступілі ў чэрвені. Наступная частка крэдыту ў 440 млн. долараў абяцана восенню. Аднак для яе атрымання беларускім уладам трэба выканаць шэраг умоў, у тым ліку — праводзіць жорсткую бюджэтную палітыку і паменшыць дэфіцыт бюджэту сектара дзяржкіравання.
Аляксей Арэшка,
БелаПАНМінск, 2 верасня 2011
