Санкцыі ЗША ў дачыненні да Беларусі сталі "адэкватным водгукам на жудасныя расправы, што адбываліся падчас прэзідэнцкіх выбараў", заявіў саветнік амерыканскага прэзідэнта па нацыянальнай бяспецы, старшы дырэктар па Расіі і Еўразіі Савета нацыянальнай бяспекі ЗША Майкл Макфал у інтэрв`ю радыёстанцыі "Голас Амерыкі".
Ён падкрэсліў: "Гэтыя санкцыі — амерыканскія. Я хачу ўнесці яснасць: мы не ішлі за еўрапейцамі. Яны ўвялі свае санкцыі, мы — свае. Мы глыбока ўпэўнены, што гэта быў адэкватны водгук".
31 студзеня Дзярждэпартамент ЗША аб`явіў аб пашырэнні візавых санкцый у дачыненні да беларускіх чыноўнікаў і аб аднаўленні санкцый у дачыненні да некаторых беларускіх прадпрыемстваў.
Першапачаткова эканамічныя санкцыі супраць канцэрна "Белнафтахім" былі ўведзены ЗША ў лістападзе 2007 года ў сувязі з парушэннем правоў чалавека ў Беларусі. У сакавіку 2008 года, пасля таго як улады Беларусі адмовіліся вызваліць былога кандыдата ў прэзідэнты Аляксандра Казуліна, ЗША ўвялі санкцыі ў дачыненні да ўсіх прадпрыемстваў, што ўваходзяць у склад канцэрна.
У верасні 2008 года Мінфін ЗША на паўгода змякчыў эканамічныя санкцыі ў дачыненні да ААТ "Лакафарба" і "Полацк-Шкловалакно". Дзеянне гэтага рашэння неаднаразова працягвалася, апошні раз — 30 лістапада 2010 года. Гэта рашэнне, якое дае амерыканскім грамадзянам і кампаніям магчымасць супрацоўнічаць з названымі прадпрыемствамі, павінна было дзейнічаць да 31 мая 2011 года.
2 лютага прадстаўнік Дзярждэпа ЗША Лорэнс Сілверман, выступаючы ў Брукінгскім інстытуце ў Вашынгтоне, заявіў: санкцыі не з`яўляюцца пастаяннай палітыкай ЗША ў адносінах да Беларусі. "Санкцыі — гэта не мэта, гэта не палітыка, гэта інструмент, спосаб уплыву. Мы ўважліва назіраем за тым, якія будуць змены. Мы па-ранейшаму патрабуем вызваліць усіх затрыманых на акцыях пратэсту і зняць з іх усе абвінавачанні, а пакуль пакідаем усе прадугледжаныя санкцыямі абмежаванні ў сіле", — сказаў Сілверман.
Афіцыйны Мінск у адказ заявіў пра "абсалютную бесперспектыўнасць" санкцый.
Таццяна Каравянкова,
БелаПАНМінск, 14 лютага 2011
