Паводле слоў Аксаны Гайдук, у Беларусі штогод утвараецца каля 4 млн т цвёрдых камунальных адходаў. "Выкарыстоўваецца сёння больш за трэць таго аб`ёму камунальных адходаў, які ўтвараецца ў нашай краіне. У Беларусі, паводле аператыўнай інфармацыі (лічба будзе ўдакладняцца), па выніках 2024 года гэты ключавы паказчык склаў 37,9 працэнта. 12 гадоў таму на перапрацоўку адпраўлялася толькі 10 працэнтаў адходаў, якія ўтвараліся ў насельніцтва. Гэта значыць за гэты час узровень выкарыстання цвёрдых камунальных адходаў у нашай краіне вырас больш як у 3 разы", - расказала яна.

Паводле яе слоў, галоўнае - удалося дабіцца ўстойлівага росту ўзроўню выкарыстання камунальных адходаў. "Мы з`яўляемся лідарамі па гэтым паказчыку сярод краін Еўразійскага эканамічнага саюза. Напрыклад, у Расійскай Федэрацыі выкарыстоўваецца паўторна 13,9 працэнта ад агульнай колькасці ўтвараемых камунальных адходаў (даныя па выніках 2023 года), - прывяла факт дырэктар установы. - Сутнасць нацыянальнай стратэгіі ў абыходжанні з адходамі заключаецца ў тым, каб як мага больш іх перапрацаваць і як мага менш пахаваць на смеццевых палігонах. Для гэтага мадэрнізуецца, удасканальваецца ўся сістэма абыходжання з камунальнымі адходамі, развіваюцца магутнасці па сартаванні, укараняюцца новыя метады і тэхналогіі выкарыстання ЦКА".

Ключавыя напрамкі, па якіх ДУ "Аператар ДМР" працуе цяпер і на якіх будзе сканцэнтравана ў бліжэйшыя гады, - развіццё інфраструктуры збору і перапрацоўкі адходаў, мадэрнізацыя сістэмы кіравання камунальнымі адходамі з пераходам ад раённай да рэгіянальнай са стварэннем сучасных буйных комплексных аб`ектаў па сартаванні і выкарыстанні ЦКА, што абслугоўваюць па 3-4 раёны. "Яшчэ два важныя напрамкі, якія плануем актыўна развіваць, - энергетычнае выкарыстанне адходаў і біялагічная апрацоўка ЦКА, гэта значыць кампаставанне", - адзначыла Аксана Гайдук.

11 студзеня 2025, Мінск
БЕЛТА