Золатавалютныя рэзервы (ЗВР) Беларусі выраслі за май прыкладна на 2% і паставілі новы гістарычны рэкорд, вынікае са звестак Нацыянальнага банка.
Сума актываў у доларавым эквіваленце склала 11 158 млн. На гэты раз рост быў не за кошт павелічэння долі манетарнага золата. Павялічыліся менавіта актывы ў замежнай валюце.
У канцы мая старшыня праўлення Нацбанка Беларусі Раман Галоўчанка анансаваў пераадоленне планкі ў 11 млрд. У цэлым рост ён звязаў з некалькімі фактарамі. Ключавы з іх – правільная выбраная палітыка па кіраванні рэзервамі. Гаворка ідзе пра тое, у якой менавіта форме захоўваць пэўныя аб’ёмы ЗВР: у золаце, замежнай валюце, акцыях, каштоўных камянях і гэтак далей.
Другі фактар, па словах Галоўчанкі, – скупка валюты ў кампаній і насельніцтва. Статыстыка рэгулятара паказвае, што ў маі фізічныя асобы заставаліся чыстымі прадаўцамі валюты. Грамадзяне прадалі яе на 178,5 млн долараў больш, чым купілі. Калі ўлічваць і наяўныя, і безнаяўныя аперацыі, грамадзяне здалі за месяц больш за 1,2 млрд у доларавым эквіваленце.
На дадзены момант Нацбанк выконвае гадавую мэту па ЗВР, якія на 31 снежня павінны быць не менш за 7,1 млрд долараў. Пры гэтым з пачатку бягучага года актывы толькі растуць.
