25 лістапада міністр замежных спраў Беларусі Уладзімір Макей прыняў выканаўчага дырэктара Усходняга камітэта нямецкай эканомікі Райнера Лінднера, які прыбыў у Беларусь на чале дэлегацыі дзелавых колаў Германіі. У сустрэчы таксама ўзяў удзел пасол ФРГ у Беларусі Петэр Дэтмар. 

У цэнтры ўвагі гутаркі былі пытанні беларуска-германскага эканамічнага ўзаемадзеяння.

Бакі абмяняліся меркаваннямі аб магчымых шляхах актывізацыі супрацоўніцтва паміж дзвюма краінамі ў галіне гандлю, інвестыцый і вытворчай кааперацыі. Дасягнута дамоўленасць аб правядзенні шэрагу канкрэтных мерапрыемстваў эканамічнай накіраванасці. 

На канферэнцыі 18 лістапада ў Мінску пасол Петэр Дэтмар заявіў, што эканамічныя праблемы Беларусі апошніх гадоў у большай ступені звязаныя з палітычнымі рашэннямі, чым з дзеяннем еўрапейскіх санкцый. "Прыпыненне санкцый ЕС — гэта адказ на тое, што адбывалася ў вашай краіне апошнім часам. І гэтым жэстам мы запрашаем вас пачаць адносіны з нуля, з чыстага ліста.

Спадзяюся, мы зможам пабудаваць паўнацэнны дыялог", — заявіў пасол.

Аляксей Арэшка, БелаПАН
Мінск, 25 лістапада 2015