У Маскве 15 ліпеня адбылося чарговае пасяджэнне камісіі па эканамічных пытаннях пры Эканамічным савеце СНД. 

Прадметам разгляду, у прыватнасці, сталі праекты плана мерапрыемстваў па рэалізацыі трэцяга этапу (2016—2020 года) стратэгіі эканамічнага развіцця Садружнасці на перыяд да 2020 года, канвенцыі аб міжрэгіянальным супрацоўніцтве, пратакола аб унясенні змяненняў у пагадненне аб правілах вызначэння краіны паходжання тавараў у СНД ад 20 лістапада 2009 года, асноўных кірункаў і плана мерапрыемстваў па далейшым развіцці медыка-сацыяльнай дапамогі і павышэнні якасці жыцця ветэранаў войн — удзельнікаў лакальных канфліктаў і членаў іх сем`яў у дзяржавах СНД на перыяд да 2020 года. 

Быў абмеркаваны ход рэалізацыі палажэнняў дагавора аб зоне свабоднага гандлю ад 18 кастрычніка 2011 года, а таксама міждзяржаўнай мэтавай праграмы "Рэкультывацыя тэрыторый дзяржаў, якія падвергліся ўздзеянню ўраназдабыўных вытворчасцяў". 

Члены камісіі абмеркавалі дзейнасць Электраэнергетычнага савета Садружнасці ў 2011—2014 гадах, а таксама Каардынацыйнага савета кіраўнікоў падатковых служб дзяржаў — удзельніц СНД. 

Разгледжана пытанне аб стварэнні Міжнароднага вучэбнага цэнтра па падрыхтоўцы, прафесійнай перападрыхтоўцы і павышэнні кваліфікацыі спецыялістаў дзяржаў СНД у галіне вытворчасці, транспарціроўкі, захоўвання і выкарыстання прыроднага газу ў якасці маторнага паліва на базе Расійскага дзяржаўнага ўніверсітэта нафты і газу імя І.М.Губкіна. 

Удзельнікі пасяджэння заслухалі і абмеркавалі інфармацыю аб удакладненні плана першачарговых мерапрыемстваў па рэалізацыі канцэпцыі супрацоўніцтва дзяржаў Садружнасці ў галіне выкарыстання ўзнаўляльных крыніц энергіі. 

Акрамя гэтага члены камісіі па эканамічных пытаннях разгледзелі пытанні аб развіцці банкаўскага рэгулявання і нагляду ў дзяржавах СНД у 2013—2015 гадах, аб павышэнні ўзроўню фінансавай дасведчанасці і развіцця фінансавай адукацыі ў дзяржавах СНД, аб зводным пераліку канкурэнтаздольнай прадукцыі, прапанаванай вытворцамі краін Садружнасці. 

Быў абмеркаваны таксама шэраг бюджэтна-фінансавых і арганізацыйных пытанняў. 

Пасля ўліку заўваг, выказаных падчас пасяджэння, праекты дакументаў будуць прадстаўлены на разгляд Эканамічнага савета СНД.

Вячаслаў Будкевіч, БелаПАН
Мінск, 15 ліпеня 2015