Праект новага дзяржаўнага стандарту на гасцінічныя паслугі распрацавалі спецыялісты Беларускага дзяржаўнага інстытута стандартызацыі і сертыфікацыі (БелДІСС). У праекце вызначаны крытэрыі і парадак бальнай ацэнкі атэляў у залежнасці ад катэгорыі. Дакумент распаўсюджваецца практычна на ўсе сродкі размяшчэння за выключэннем тых, што здаюцца ўнаём для пражывання, выкарыстоўваюцца для арганізацыі адпачынку і аздараўлення дзяцей, сацыяльнага абслугоўвання, медыцынскіх устаноў, а таксама кемпінгаў, інтэрнатаў.

"Цяпер дзейнічае ДАСТ 28681.4-1995, распрацаваны на аснове рэкамендацый Сусветнай турысцкай арганізацыі. Але за мінулы час прагрэс зрабіў крок наперад, і многія з устаноўленых патрабаванняў маральна ўстарэлі, - адзначыла начальнік аддзела сертыфікацыі паслуг БелДІСС Таццяна Смірнова. - Настаў час распрацаваць новы стандарт, які ўлічвае сучасныя тэндэнцыі, перш за ўсё прымяненне тэлекамунікацыйных тэхналогій. Неабходна таксама выключыць устарэлыя нормы і паслугі, якімі ўжо не карыстаюцца госці. Напрыклад, неактуальна наяўнасць тэлефоннага апарата пад акустычным каўпаком у холе, радыё, канверта, ручкі і пісьмовай паперы ў нумарах".

У новым дакуменце прадугледжаны патрабаванні ў залежнасці ад канкрэтных тыпаў гасцініц. Так, у атэляў да 15 нумароў набор патрабаванняў адзін, пры большай колькасці пакояў - другі.

"Сустракаецца такое, што гасцініца маленькая, але пры гэтым у яе сучасны інтэр`ер, добрая аснашчанасць нумароў, ветлівы і добразычлівы персанал. Яна магла б атрымаць чатыры або пяць "зорак", але для гэтага цяпер трэба мець шырокі пералік прадастаўляемых паслуг. Аднак пры колькасці нумароў не большай за 15 немагчыма, напрыклад, пабудаваць спа-цэнтр або канферэнц-залу. Дзякуючы дыферэнцыраванаму падыходу, гасцініцы пашыраць свае магчымасці для атрымання "зорак", - растлумачыла вядучы інжынер аддзела сертыфікацыі паслуг БелДІСС Таццяна Фаменка.

Акрамя таго, распрацоўшчыкі перагледзелі патрабаванні да курортных атэляў, гасцініц у будынку або на тэрыторыі помнікаў архітэктуры, якія аказваюць аздараўленчыя паслугі, апарт-атэляў, студый, дамоў адпачынку і інш.

У прэс-службе Дзяржстандарту адзначылі, што класіфікацыя гасцініц праходзіць у некалькі этапаў па катэгорыях і заснавана на комплексе патрабаванняў да матэрыяльна-тэхнічнага забеспячэння, наменклатуры і якасці аказваемых паслуг, узроўню абслугоўвання, а таксама на паказчыках бальнай ацэнкі гасцініц і персаналу.

Азнаёміцца з праектам СТБ "Паслугі гасцініц. Агульныя патрабаванні і класіфікацыя гасцініц" можна на сайце stb.by ў раздзеле "Распрацоўка". Прапановы і заўвагі прымаюцца ў БелДІСС да 15 студзеня 2020 года (тэлефоны 269-68-49, 269-69-51, адрасы электроннай пошты t.smirnova@belgiss.by, t.fomenko@belgiss.by). Прыняць стандарт плануецца да сярэдзіны 2020 года, а да канца года - увесці ў дзеянне.

На гэты час у рэспубліцы прымяняецца добраахвотная сертыфікацыя паслуг гасцініц і іх класіфікацыя ад адной да пяці "зорак", матэляў - ад адной да чатырох "зорак". Сертыфікаты адпаведнасці маюць 55 гасцініц. Іх пералік можна знайсці, скарыстаўшыся рэсурсам "Сертыфікаваныя атэлі Беларусі".

26 снежня 2019, Мінск
БЕЛТА