Аб гэтым рашэнні стала вядома з дакумента на афіцыйным сайце арганізацыі. Савет ISU прапанаваў пераняць практыку МАК адносна выступлення беларускіх і расійскіх атлетаў у нейтральным статусе і дапусціць атлетаў абедзвюх краін да ўдзелу ў адборачных стартах на Гульні-2026 у Італіі. Для гэтага прадстаўнікі Беларускага саюза канькабежцаў павінны падаць заяўкі на ўдзел у спаборніцтвах не пазней за 28 лютага 2025 года.

Алімпійскія кваліфікацыйныя спаборніцтвы па фігурным катанні пройдуць у верасні наступнага года ў Пекіне. Адбор на Гульні ў шорт-трэку будзе ажыццяўляцца на этапах сусветнага тура ў Манрэалі, Солт-Лейк-Сіці, Гданьску і Дордрэхце, якія пройдуць у перыяд з 16 кастрычніка па 30 лістапада 2025 года. Ліцэнзійнымі для канькабежцаў стануць этапы Кубка свету ў Солт-Лейк-Сіці, Калгары, Херэнвене і Хамары з 14 лістапада па 14 снежня 2025 года.

20 снежня 2024, Мінск
БЕЛТА