Сёння на лёдзе "Алімпік-Арэны" ў Мінску дружына кіраўніка дзяржавы абыграла каманду Мінскай вобласці з лікам 3:0 (1:0, 1:2, 1:0).

Да гэтай сустрэчы абодва сапернікі падышлі з максімальным рэзультатам, выйграўшы па чатыры матчы. Акрамя таго, яны змагаліся ў фінальнай серыі мінулага сезона, і таму сённяшні паядынак фаварытаў чакалі з вялікай цікавасцю. Гэтыя чаканні цалкам апраўдаліся - каманды паказалі баявую гульню з мноствам атак, небяспечных кідкоў, прыгожых камбінацый і сілавой барацьбы.

Лік быў адкрыты толькі на зыходзе 12-й мінуты стартавага перыяду, калі пасля перадач Мікалая Лукашэнкі і Арцёма Каркоцкага шайбу ў вароты гасцей адправіў Аляксей Яфіменка. У пачатку другога перыяду Аляксандр Кудраўцаў зраўнаваў рэзультат, потым Максім Парфеевец, выкарыстаўшы  дакладны пас Мікалая Лукашэнкі, зноў вывеў гаспадароў наперад, але незадоўга да другога перапынку Мікіта Драздоў зноў аднавіў парытэт - 2:2.

У заключнай дваццацімінутцы хакеістам сталічнага рэгіёна давялося вельмі цяжка - у іх былі выдалены адразу два ігракі, але яны на працягу чатырох мінут змаглі выстаяць пад націскам сапернікаў. Аднак каманда кіраўніка дзяржавы ўсё ж змагла вырваць перамогу - крыху менш, чым за 3 мінуты да фінальнай сірэны пераможную шайбу закінуў Аляксей Яфіменка, які быў прызнаны лепшым іграком у складзе гаспадароў. У прайграўшых лепшым стаў галкіпер Максім Шчапко, прызы ім уручыў шматразовы чэмпіён Паралімпійскіх гульняў па плаванні Ігар Бокій.

Як звычайна ў "Алімпік-Арэне" ў перапынках хакейнага матчу шматлікія балельшчыкі ўбачылі эфектныя музычныя нумары, прынялі ўдзел у конкурсах на лядовай пляцоўцы, а пасля завяршэння гульні сталі ўладальнікамі мяккіх цацак ад прэзідэнцкай каманды.

У першым туры дружына кіраўніка дзяржавы перамагла ў Мінску хакеістаў Гродзенскай вобласці (10:3), потым выйграла ў Жлобіне ў каманды Гомельскай вобласці (5:2), затым зноў у Мінску перайграла сапернікаў з Брэсцкай вобласці (8:2) і Віцебскай вобласці (10:4).

Пасля пяці згуляных паядынкаў у актыве прэзідэнцкай каманды 10 пунктаў з 10 магчымых. Гонку бамбардзіраў ўзначальвае форвард прэзідэнцкай каманды Андрэй Касціцын, у якога 14 балаў - 4 галы і 10 выніковых перадач.

У фінальнай серыі мінулага аматарскага турніру лядовая дружына Прэзідэнта двойчы абыграла хакеістаў Мінскай вобласці - 5:2 і 10:8 і 15-ы раз стала пераможцай гэтых спаборніцтваў. Па адным тытуле ў каманд Гомельскай і Мінскай абласцей.

Арганізатары хакейнага аматарскага турніру - Прэзідэнцкі спартыўны клуб, Міністэрства спорту і турызму і Мінскі гарадскі выканаўчы камітэт.

15 лютага 2025, Мінск
БЕЛТА