"Шаўковы шлях" можа стаць адным з самых складаных марафонаў у гісторыі. Працягласць спецучасткаў — рэкордныя 4.089 км. "Ралі летась перасягнула па складанасці "Дакар", а сёлета стане яшчэ больш суровым, — сказаў кіраўнік каманды Сяргей Вязовіч. — Пры гэтым доўгія спецучасткі стануць дадатковымі цяжкасцямі. Па ўсёй бачнасці, гэта будзе знясільваючая гонка, якая праверыць на трываласць не толькі баявыя машыны, але і людзей".

Каманда "МАЗ-СПОРТаўта" выставіць на ралі тры аўтамабілі, якія ўжо пабывалі на "Дакары". Машыны практычна не змяніліся, хіба што спецыялісты папрацавалі над рухавікамі — зрабілі іх больш магутнымі і надзейнымі. Акрамя таго, у кабінах усталявалі новыя кандыцыянеры, каб перажыць анамальную спёку ў пустыні Гобі. Для гонкі таксама прадугледзелі два тыпы шын — для цвёрдых дарог і пяскоў.

Канкурэнцыю беларусам складуць наймацнейшыя пілоты свету. КАМАЗ выставіць адразу пяць экіпажаў. У гонцы возьме ўдзел галандзец Жэрар дэ Рой на Iveco, пераможца леташняга "Дакара". На ралі таксама выступяць гоншчыкі на грузавіках Tatra і Renault.

Ралі-рэйд "Шаўковы шлях — 2017" пройдзе з 7 па 22 ліпеня па тэрыторыях трох краін — Расіі, Казахстана і Кітая. Гонка прывядзе экіпажы з Масквы ў кітайскі горад Сіань. Працягласць усяго маршруту складзе 9.608 км, з якіх 4.089 км прыпадуць на спецучасткі. Гоншчыкам трэба будзе пераадолець горныя ўчасткі, камяністую бездараж і барханы. З многімі перашкодамі экіпажы сутыкнуцца ўпершыню.

Каманда "МАЗ-СПОРТаўта" рэгулярна выступае на міжнародным ралі-рэйдзе "Шаўковы шлях". Летась адразу тром беларускім экіпажам удалося ўвайсці ў першую дзясятку.

Аляксей Арэшка, БелаПАН
Мінск, 13 чэрвеня 2017