З сённяшняга дня ў беларускіх авіякампаній - у першую чаргу "Белавія" - ёсць магчымасць прадаваць тавары з Duty Free.

Указ №296 "Аб бязмытным гандлі на бартах паветраных судоў" беларускі лідар падпісаў 5 жніўня. Згодна з дакументам, на бартах беларускіх авіякампаній дазваляецца продаж тавараў з крамаў бязмытнага гандлю.

Дакумент быў афіцыйна апублікаваны на Нацыянальным прававым інтэрнэт-партале, уступіў у сілу ён пасля апублікавання.

Такім чынам, ужо з 7 жніўня беларускія авіякампаніі могуць прадаваць на міжнародных авіярэйсах тавары з Duty Free. Найбуйнейшая беларуская авіякампанія "Белавія" планавала пачаць тэставанне новай магчымасці да канца жніўня.

Гаворка ва ўказе ідзе пра магчымасць гандлю на рэйсах, якія будуць выконвацца за межы Еўразійскага эканамічнага саюза.

Кампанія "Белавія" даўно дамагалася магчымасці прадаваць тавары з Duty Free на борце. Як заяўляў гендырэктар кампаніі Анатоль Гусараў, гэта магло б спрыяць і зніжэнню кошту авіябілетаў, так як прадаставіла б перавозчыку дадатковыя магчымасці для заробку.

Мінск, 7 жніўня 2019
Sputnik