Рассельгаснагляд выявіў канал незаконных паставак у Расію курыных кумпячкоў з ЗША пад выглядам транзіту з Прыбалтыкі ў Казахстан праз беларускую мяжу. 

"Цяпер паўстала сітуацыя, калі праз Прыбалтыку і нібыта транзіт у Казахстан нехта хоча вельмі сур`ёзную колькасць амерыканскай кураціны адправіць у Расію. Уязджаюць праз беларускую мяжу, так лягчэй. Добра, што ў нас у Смаленску ёсць магчымасць надгледзець. Для нас відавочна, што цяпер імкнуцца апрабаваць новы канал незаконнага ўвозу ў Расію", — цытуе Данкверта ТАСС.

Пастаўкі мяса птушкі з ЗША ў Расію былі забароненыя ў 2014 годзе. Аднак дазволены транзіт гэтай прадукцыі па тэрыторыі Расіі ў трэція краіны, чым і карыстаюцца арганізатары нелегальных схем, растлумачыў кіраўнік Рассельгаснагляду.

Данкверт лічыць, што сітуацыю, якая склалася, неабходна абмяркоўваць на ўзроўні Еўразійскай эканамічнай камісіі. "Мы нашым калегам кажам: давайце збярэмся ў ЕЭК і будзем гэта абмяркоўваць усе разам", — падсумаваў ён.

Аляксей Арэшка, БелаПАН
Мінск, 5 кастрычніка 2018