1 ліпеня 2011 года пачынаецца новы этап фарміравання Адзінай эканамічнай прасторы Расіі, Беларусі і Казахстана, паведамляе Федэральная мытная служба Расіі. Мытныя органы спыняюць ажыццяўленне функцый мытнага кантролю тавараў на ўнутраных межах краін Мытнага саюза.
На расійска-беларускай мяжы ў пунктах прыняцця паведамленняў (ППП) спыняецца ажыццяўленне аперацый па кантролі транзіту тавараў трэціх краін. Самі ППП ліквідуюцца.
На расійска-казахстанскім участку мяжы мытныя органы спыняюць правядзенне мытных аперацый і ўсіх функцый па мытным кантролі ў дачыненні да тавараў і транспартных сродкаў, якія перамяшчаюцца цераз дзяржаўную мяжу Расіі.
Функцыі мытнага кантролю ў дачыненні да тавараў і транспартных сродкаў, якія накіроўваюцца на тэрыторыю Мытнага саюза, будуць ажыццяўляцца мытнымі службамі Расіі, Беларусі і Казахстана ў пунктах пропуску на знешняй мяжы МС.
Мытныя службы трох краін будуць абменьвацца асноўнымі звесткамі па кожнай таварнай партыі, якая афармляецца на іх тэрыторыі. Інфармацыйны абмен і іншыя формы ўзаемадзеяння ва ўмовах адзінай мытнай прасторы дазволяць своечасова рэагаваць на рызыкі, адзначае ФМС Расіі.
Аляксей Арэшка,
БелаПАНМінск, 1 ліпеня 2011
