Мытны саюз Беларусі, Казахстана і Расіі адкрыты для далучэння іншых краін і да больш цеснага супрацоўніцтва з Еўрасаюзам. Пра гэта заявіў прэм`ер-міністр Расіі Уладзімір Пуцін 5 мая на пасяджэнні прэзідыума расійскага ўрада ў Маскве.
Паводле яго слоў, Мытны саюз гатовы да больш цеснага супрацоўніцтва з Еўрасаюзам, "у тым ліку ў фармаце канструктыўнага дыялогу АЭП і ЕС".
Пуцін таксама выказаў упэўненасць, што "новы магутны інтэграцыйны саюз можа кардынальна змяніць геапалітычную канфігурацыю ўсёй еўразійскай прасторы, стымуляваць аб`яднаўчыя працэсы ў СНД".
Прэм`ер-міністр Расіі падкрэсліў, што фарміраванне Адзінай эканамічнай прасторы арганічна ўпісваецца ў канцэпцыю выбудоўвання гарманічнай супольнасці эканомік на еўраазіяцкім кантыненце.
Ён папрасіў зацікаўленыя бакі надаваць развіццю інтэграцыйных сувязяў "асаблівую ўвагу і дакладна прытрымлівацца зацверджанага плана дзеянняў па стварэнні АЭП".
Пуцін зазначыў, што вынікі інтэграцыі прыкметныя ўжо зараз. За 2010 год тавараабарот Мытнага саюза ўзрос на 28%, поўным ходам ідзе фарміраванне АЭП.
Паводле яго слоў, АЭП павінна быць сфарміравана да 2012 года, яна будзе ўяўляць сабой адзіны рынак са свабодным перамяшчэннем тавараў, паслуг, капіталу і працоўнай сілы.
Анастасія Янушэўская,
БелаПАНМінск, 5 мая 2011
