“Расея зрабіла падарунак А. Лукашэнку да ягонага заступленьня на пасаду на новы тэрмін. Хаця з Масквы на цырымонію інаўгурацыі ў Менск ніхто не прыедзе, напярэдадні прэм’еры дзьвюх краінаў дамовіліся аб нафце і газу”, – піша расейскае інтэрнэт-выданьне Business FM.
Узамен на танныя нафту і газ Лукашэнка пагадзіўся працягнуць курс на інтэграцыю з РасеяйКамэнтуючы вынікі перамоў у Маскве прэм’ер-міністра Беларусі Міхаіла Мясьніковіча і кіраўніка расейскага ўраду Ўладзімера Пуціна, інтэрнэт-выданьне таксама адзначае, што “Расея накіруе на субсыдыі па пастаўках нафты і газу 4 мільярды даляраў. Акрамя таго, стала вядома, што АЭС у Беларусі будзе пабудаваная на расейскі крэдыт. Паводле экспэртаў, у эканамічным сэнсе Расея мала што набывае ад гэтых дамоўленасьцяў... Акрамя канкрэтных пытаньняў паставак нафты і газу, прэм’еры Расеі і Беларусі абмеркавалі іншыя пытаньні. Напрыклад, яны вызначыліся з датай правядзеньня пасяджэньня кабміну саюзнай дзяржавы, а таксама абвясьцілі пра завяршэньне фармаваньня прававой базы адзінай эканамічнай прасторы. На думку палітолягаў, гэта можа сьведчыць, што ўзамен на танныя нафту і газ Лукашэнка пагадзіўся працягнуць курс на інтэграцыю з Расеяй. Пытаньне ў тым, ці будзе непрадказальны беларускі лідэр выконваць свае абяцаньні”, – піша Business FM.
“Будзем імкнуцца да таго, каб аб’ём субсыдаваньня беларускай эканомікі ў нафтавым сэктары складаў суму, ня меншую за тую, якую Беларусь атрымлівала ў 2007-2009 гг. да ўвядзеньня мыты на нафту. Гэтая сума складае 4, 124 мільярды. Ёсьць пэўныя пытаньні з разьлікамі, але мы пацьвердзілі сваю пазыцыю”, – цытуе маскоўская газэта “Ведомости” прэм’ер-міністра Расеі Ўладзімера Пуціна.
“Беларуская АЭС будзе складацца з двух энэргаблёкаў сумарнай магутнасьцю 2,4 МВт. Увод у эксплюатацыю першага блёку прызначаны на 2016 год, другога – на 2018 год”, – паведамляе “Комсомольская правда”.
«Расея тут выйграе ў сэнсе экспансіі сваёй атамнай энэргетыкі, – заявіў Business FM экспэрт Цэнтру палітычнай каньюнктуры Павел Салін. – І Лукашэнка ўжо намякаў, калі ў нас былі абвастрэньні, летась увосень, што кантракт на будаўніцтва гэтай АЭС могуць атрымаць і іншыя фірмы, у прыватнасьці, амэрыканская кампанія Westinghouse або нейкія іншыя”.
Дума ніякіх заяў наконт вызваленьня расейцаў з беларускіх турмаў прымаць не зьбіраецца“Российская газета” нагадвае, што Эўрапарлямэнт прыняў жорсткую рэзалюцыю па Беларусі і піша, што “пра гэта прэм’еры паразмаўлялі тэт-а-тэт пасьля прэсавай канфэрэнцыі. Пуцін толькі сказаў, што днямі пры сустрэчы з “адзінаросамі” яны цікавіліся, што ўрад будзе рабіць для вызваленьня расяянаў зь беларускіх турмаў. Пры гэтым ён патлумачыў, што Дума ніякіх заяў на гэты конт, наколькі яму вядома, прымаць не зьбіраецца”.
Радыё Свабода21 студзеня 2011
