"Сёння па ўсёй краіне праходзяць школьныя лінейкі. 1 млн 55 тыс. вучняў гатовы пачаць вучобу. Вельмі прыемна, што для гэтага створаны ўсе ўмовы", - сказаў Аляксандр Кадлубай.

У гэтым годзе ў Азярцоўскай сярэдняй школе за парты селі 88 першакласнікаў. "Я хачу пажадаць вам, каб вы цягнуліся за сваімі старэйшымі калегамі, пакаралі веды, радавалі сваіх бацькоў і настаўнікаў, - адзначыў намеснік міністра. - Паважаныя адзінаццацікласнікі, вас чакае няпросты год. Хацелася б пажадаць, каб усе тыя вашы прафесійныя планы, з якімі вы ўжо стаіце тут, ажыццявіліся і вы ўдала завяршылі вучобу, атрымалі дакумент аб адукацыі і здалі ЦТ".

Аляксандр Кадлубай падкрэсліў: педагогі і бацькі павінны ўзаемадзейнічаць адзін з адным. "Мы, дарослыя, павінны сёння рабіць усё для таго, каб у нашых дзяцей была шчаслівая будучыня. І гэта не проста пафасныя словы - гэта сённяшняя рэальнасць", - заявіў ён.

Дырэктар школы Віктар Савіцкі дадаў, што ўсе выпускнікі школы знаходзяць сябе ў жыцці. "Сёння мне прыемна канстатаваць той факт, што ўсе 100 працэнтаў выпускнікоў 11-х класаў паступілі ў вышэйшыя навучальныя ўстановы на бюджэтную форму. Усе выпускнікі 9-х класаў таксама на 100 працэнтаў вызначыліся са сваім далейшым жыццеўладкаваннем. За што вялікі дзякуй педагагічным работнікам, а бацькам - за падтрымку і ўзаемаразуменне. Я вельмі спадзяюся і на выпускнікоў гэтага года. Асабліва хачу звярнуцца да нашых першакласнікаў, якіх мы прымаем у нашу школьную сям`ю. Я шчыра віншую вас і вашых бацькоў. Вельмі спадзяюся, што з першых дзён мы знойдзем узаемаразуменне і ўсё будзе складвацца найлепшым чынам", - сказаў ён.

Аляксандр Кадлубай уручыў Азярцоўскай сярэдняй школе сертыфікат на інтэрактыўны мультыборд. "Я ведаю, што вашы кабінеты аснашчаны па апошнім слове тэхнікі, але падарунак ніколі не бывае лішнім", - сказаў на заканчэнне ён.

1 верасня 2020, Мінск
БЕЛТА