Паводле слоў кіраўніка рэгіёна, маладым спецыялістам — асаблівая ўвага. «Пасля абавязковага тэрміну адпрацоўкі ў сярэднім па вобласці застаюцца ва ўстановах адукацыі 79 працэнтаў з іх. Лічба год ад году расце: з 75 працэнтаў у 2018 годзе», — сказаў Іван Крупко. На яго думку, сваю ролю ў гэтым адыгралі шматлікія льготы і прэферэнцыі — як на дзяржаўным узроўні, так і прадугледжаныя калектыўнымі дагаворамі.
У тых раёнах, дзе сур’ёзна працуюць над гэтай задачай, замацавальнасць значна вышэйшая. Пасля заканчэння тэрміну абавязковай адпрацоўкі замацаваліся больш за 79 працэнтаў маладых спецыялістаў 2018 года выпуску ў Буда-Кашалёўскім, Гомельскім, Добрушскім, Ельскім, Жлобінскім, Мазырскім, Петрыкаўскім, Рагачоўскім, Светлагорскім, Хойніцкім, Чачэрскім, Рэчыцкім раёнах, Гомелі«, — пералічыў губернатар.
У той жа час выканкамам раёнаў, дзе замацавальнасць ніжэйшая за сярэднеабласную, неабходна ўзяць на кантроль гэтыя пытанні, падкрэсліў Іван Крупко. «Цякучасць кадраў ва ўстановах адукацыі — гэта сур’ёзны ўрон якасці навучання і выхавання», — аргументаваў ён.
Як лічыць Іван Крупко, належную ўвагу трэба ўдзяляць і толькі назначаным кіраўнікам. «Неабходна адрадзіць у добрым сэнсе слова настаўніцтва, замацаванне за вопытнымі дырэктарамі ўстаноў. Першы год работы забяспечыць патранат і дапамогу з боку аддзелаў адукацыі», — падзяліўся сваім бачаннем старшыня аблвыканкама.
У сувязі з гэтым немалаважнай ён назваў і работу з рэзервам на кіруючыя пасады. «Пытанне сёння актуальнае ва ўсіх галінах. Адукацыя — не выключэнне. У вашай структуры ёсць метадычныя кабінеты ў аддзелах адукацыі, абласны інстытут развіцця адукацыі, якія прызначаны займацца падрыхтоўкай рэзервістаў», — рэзюмаваў губернатар.
Абласны жнівеньскі педсавет сабраў сёння ў Гомелі амаль тысячу ўдзельнікаў. У абмеркаванне задач, планаў на новы навучальны год, развіцця галіны ўключыліся прадстаўнікі ўлады, дэпутацкага корпуса, кіраўнікі і работнікі сістэмы адукацыі рэгіёна.
На нарадзе ўручылі заслужаныя ўзнагароды педагогам. Ушаноўвалі і тых работнікаў адукацыі, хто ў гарачыя летнія месяцы дапамагаў на ўборцы новага ўраджаю. Свой падарунак настаўнікам падрыхтавалі школьнікі рэгіёна — святочны канцэрт. А выстаўка, якая разгарнулася ў фае грамадска-культурнага цэнтра, расказала аб дасягненнях і поспехах вучняў і педагогаў рэгіёна, аб распрацаваных імі інфармацыйна-адукацыйных рэсурсах і праектах.
Звязда, 26 жніўня 2022
