Вікторыя Абрамчанка адзначыла, што Дзень яднання народаў Беларусі і Расіі сваімі каранямі ідзе ў 1996 год, калі быў падпісаны першы дагавор аб тым, што Расія і Беларусь дамаўляюцца аб інтэграцыйных працэсах.

«Гэта свята прайшло праверку часам і падмацавана рэальнымі канкрэтнымі поспехамі. У нас ёсць пэўныя поспехі як у сферы бяспекі, так і ў гуманітарных кантактах. Вялікія поспехі ў эканамічным супрацоўніцтве. Падпісаны 28 саюзных праграм, і гэтыя праграмы актыўна рэалізуюцца з боку ўрадаў Расіі і Беларусі», — сказала яна.

Па словах намесніцы старшыні Дзярждумы, важна і тое, што абедзве краіны ў сучасных умовах стаяць на варце гістарычнай памяці. «Мы не даем перапісаць гісторыю, не даем адрадзіцца неанацызму. Гэта таксама вельмі важна, асабліва ў год 80-годдзя Перамогі», — падкрэсліла Вікторыя Абрамчанка.

Асаблівую ролю адыгрывае і тое, што Беларусь і Расія разам працуюць у такіх аб’яднаннях, як ШАС, СНД, ЕАЭС, БРІКС. «Усе гэтыя аб’яднанні даюць магчымасць нам сумесна адстойваць нацыянальныя інтарэсы. Гэта дапамагае ўмацаванню нашага суверэнітэту. Таксама нядаўна прайшлі выбары Прэзідэнта Рэспублікі Беларусь, і мы ў дзеянні ўбачылі, як рэалізуецца электаральны суверэнітэт. Гэта яшчэ адна наша агульная перамога», — дадала намесніца старшыні Дзярждумы.

2 красавіка адзначаецца Дзень яднання народаў Беларусі і Расіі — свята, заснаванае ўказамі прэзідэнтаў Рэспублікі Беларусь і Расійскай Федэрацыі. Асноўныя мерапрыемствы традыцыйна праходзяць у Маскве і Мінску. Адной з ключавых падзей гэтага дня з’яўляецца канцэрт у Палацы Рэспублікі, дзе выступаюць лепшыя артысты дзвюх краін. У праграме ўдзельнічаюць Дзяржаўны акадэмічны рускі народны хор імя М.Я.Пятніцкага, Беларускі дзяржаўны акадэмічны заслужаны харэаграфічны ансамбль «Харошкі», Губернатарская сімфанічная капэла Пензенскай вобласці, заслужаны калектыў Рэспублікі Беларусь ансамбль «Сябры», народны артыст Беларусі Анатоль Ярмоленка і многія іншыя.

Звязда, 2 красавіка 2025