Беларускае ААТ "Мінскметрапраект" створыць праект для будаўніцтва другога тунэля станцыі метро "Залатая Ніва" ў Новасібірску, гаворыцца ў дакументацыі конкурсу на партале дзяржаўных закупак.
У канцы мінулага года ўлады гэтага расійскага горада аб`явілі конкурс на распрацоўку праекта будаўніцтва перагоннага тунэля паміж станцыямі "Бярозавы гай" і "Залатая Ніва".
У адпаведнасці з дакументамі, якія былі апублікаваныя на партале, кантракт заключаны 17 лютага з кампаніяй "Мінскметрапраект" - яна абавязуецца за 10 месяцаў распрацаваць праект за 104 мільёны расійскіх рублёў, тады як пачатковы кошт складаў 133,6 мільёна.
Раней губернатар Новасібірскай вобласці Андрэй Траўнікаў паведамляў, што ў сталіцы рэгіёну аб`екты метрапалітэна даўно не ўзводзіліся і кампетэнцыі ў галіне праектавання страчаны. У сувязі з гэтым ён прапанаваў разгледзець магчымасць прыцягнення да работ беларускіх ці маскоўскіх праектоўшчыкаў.
Па праектах "Мінскметрапраект" была пабудавана мінская падземка - 33 станцыі і два электрадэпо, а таксама пяць станцый Маскоўскага метрапалітэна ("Алма-Ацінская", "Некрасовка", "Лухманаўская", "Вуліца Дзмітрыеўскага" і "Косіна") і тры электрадэпо.
Новасібірскі метрапалітэн - адзіны ў Расіі які знаходзіцца за Уралам. Ён мае дзве лініі - Ленінскую і Дзяржынскую (усяго 13 станцый). Апошняя станцыя - "Залатая ніва" - была ўведзена ў эксплуатацыю зімой 2011 года.
