29 верасня ў Казані пачалося 16-е пасяджэнне Беларуска-расійскай міжурадавай камісіі па ваенна-тэхнічным супрацоўніцтве.

Дэлегацыю ад арганізацый абароннага сектара эканомікі Беларусі ўзначальвае старшыня беларускай часткі камісіі — першы намеснік старшыні Дзяржаўнага ваенна-прамысловага камітэта Ігар Быкаў. 

Бакі плануюць абмеркаваць стан і перспектывы двухбаковага ваенна-тэхнічнага супрацоўніцтва, а таксама разгледзець ход рэалізацыі бягучых праектаў і вызначыць перспектыўныя праекты супрацоўніцтва ў ваенна-тэхнічнай сферы на 2015—2016 гады. 

На пасяджэнні камісіі плануецца разгледзець пытанні выканання дзеючага заканадаўства і далейшага ўдасканалення нарматыўнай прававой базы двухбаковага ваенна-тэхнічнага супрацоўніцтва. 

У прыватнасці, плануюцца да разгляду пытанні ўзаемадзеяння дзвюх краін у межах пагаднення аб вытворчай і навукова-тэхнічнай кааперацыі прадпрыемстваў абаронных галін прамысловасці ад 20 мая 1994 года, а таксама ў межах дагавора аб развіцці ваенна-тэхнічнага супрацоўніцтва ад 10 снежня 2009 года.

Вячаслаў Будкевіч, БелаПАН
Мінск, 29 верасня 2015